每種球類活動都有捧場客，美國有調查發現網球迷最容易得到性滿足。現代人要生活識得忍耐係一個重要元素，至於無性生活又可以忍得幾耐呢？有4成日本女仔表示只可以忍一個星期。另外，有調查發現9成加拿大人覺得異性喺睇書嘅時候最性感，當中最多女仔認為男士睇深奧又神秘題材嘅書籍最有魅力。
歌仔都有得唱「睇波一家大細最興奮」，各項球類活動都老幼咸宜，即使做觀眾亦一樣樂趣多多，唔少球迷睇波時鬼咁肉緊，驚呼大叫，就知道睇波有幾咁興奮幾咁過癮喇！而咁多種球迷當中，欖球迷相信係最活躍最容易神情亢奮嘅一群，一年一度嘅香港國際七人欖球賽當中，都可以見到有外國女球迷興奮到扯起件衫露出雙乳，為觀眾帶來另一種睇波樂趣。美國一家安全套品牌公司早前做過一項調查係同球迷有關，佢哋發現眾多球迷之中，以網球迷嘅性滿足比率最高，有百分之四十九認為性生活非常滿足，百分之四十一則認為滿足。搵個女網球迷做女伴咪幸福美滿？咁又未必，有百分之六十一嘅女網球迷話會喺床上假扮高潮！一段男女關係有時都係呃呃氹氹嚟維繫，唔緊要啦。
自從小弟踏足社會做事，老父第一句教導我嘅說話就係「凡事都要忍，萬事以和為貴」。以前年少氣盛，面對唔公平嘅對待，有時都會表現得暴躁，但係一記起老父嘅教誨，總算吞聲忍氣。家陣年紀大咗，仲邊度有火呢？點忍都得啦！咁要我忍住唔出火又得唔得呀？呢個咁私人嘅問題我唔會作答，交畀一眾日本女仔答啦。一個叫LC嘅日本女性護理用品網站，早前透過網上問卷訪問咗107名成年女性，問及佢哋可以忍住唔做愛幾耐。結果有45人答話可以忍到一個月，有43人表示只可以忍一個星期，而表示一日都忍唔到嘅慾望之女就有9位。咁忍唔住又可以點呢？最多女仔答話會自摸解決慾火，其次就梗係向男伴「求救」啦！
自細長輩都同我哋講話「書中自有黃金屋，書中自有顏如玉」，到長大至發現讀書多學歷高的確相當有用，好可惜小弟一向都有讀書，只不過讀嘅係鹹書。不過，大家如果好似小弟咁都唔緊要，所謂有心唔怕遲，十月都係拜年時，一於同小弟一樣拎起本書啦。加拿大一個約會網站訪問咗超過1,700名單身人士，當中超過三分之二有興趣同熱愛讀書嘅異性約會。受訪嘅兩成男士就認為睇情色小說嘅女性最性感，大家都有共同嗜好就當然覺得對方別具吸引力啦。至於女士方面就唔會有同感喇，只有百分之九嘅女性認為睇情色小說嘅男士性感，最多女士鍾意男士睇深奧又神秘嘅書籍，例如關於探索宇宙、探討生與死題材等，因為咁樣女性會覺得對方有學識、思想成熟又夠高深喎。
撰文：賢