睇日本AV都可以睇到成為專家兼搵到食？無錯！佢就係嚟自台灣有「AV達人」之稱嘅一劍浣春秋，佢不但對AV有極為深入嘅了解，對於呢份工作所付出嘅辛酸，更係非筆墨所能形容。今次有幸邀請到一劍做專訪，等佢同大家講吓呢份人人認為係筍工背後嘅樂與苦。
如果同三唔識七嘅人講AV，輕則會畀人話鹹濕，嚴重嘅會被視為變態。其實男人最初接觸性，有邊個唔係從AV開始嘅呢？至於已到不惑之年嘅一劍，第一次接觸AV同大部分男人差唔多，都係讀中學時去同學屋企睇AV。曾經有段時間佢以為睇AV會影響識女仔，及至大學修讀新聞時，先至發現溝女原來同睇AV無關，並了解到睇AV其實係男人成長嘅一部分。
之後佢喺台灣嘅BBS寫AV評論，「寫完後發覺大家原來咁有興趣，故由起初1日2篇變成1日4篇，同時會解答網友嘅問題。」不過，眼見BBS上嘅文章會過期，感覺相當可惜，於是佢決定開個博客「AV No.1」，將佢花過唔少心思嘅文章保存。唔知一劍有冇遇過唔識解答嘅AV問題呢？佢點頭話：「起初經常遇到，而我就會去搵資料研究，慢慢令我對AV世界了解更加多。」佢又謙稱：「其實呢類AV文章寫得比我好嘅大有人在，只係我不斷寫，每日都有新文章推出，而且內容緊貼潮流，因而有效維持讀者群。」不過呢種努力工作嘅背後，所付出嘅精力同時間，卻係相當艱辛，由於佢當時有正職，故此每日要花上5、6個鐘嚟睇AV同寫評論，有時偷偷喺公司邊睇邊寫，更擔心會畀同事發現添！
從當年嘅博客變成商業網站，再變成今日嘅AV文化及商品網站「Play No.1」，咪以為一劍已經上咗神枱就唔使咁辛苦，全職投身AV文化工作後，佢每日要寫起碼6篇文章之餘，仲有其他工作要應付，兼要抽時間陪老婆同兩個孩子。佢笑道：「惟有將睇片嘅時間縮短到15至20分鐘，主要睇新人嘅處女作。」一劍不諱言自己嘅口味隨住讀者而改變：「以前好鍾意睇女超人題材嘅AV，只係發現大家好似鍾意步兵片，於是我咪寫多啲呢類作品，漸漸發覺自己口味亦改變咗。」
話說回來，既然有家室，佢驚唔驚老婆詐型呢？「做博客係喺2007年9月，8個月後成立商業網站，而我跟太太喺2008年10月結婚，嗰時佢先至知道我嘅職業。起初佢唔明白點解我要做呢啲工作，經我解釋AV文化評論有其商業價值後，佢就話畀一年時間我，如未做出成績嘅話，就要重新考慮一下，好彩我總算做出成績。」因為經常喺媒體上露面關係，所以一劍去到邊都畀人認出，對於呢個問題，一劍表現得相當豁達：「反正我又唔係作奸犯科，根本就唔係一個問題。」此外，佢又表示研究得愈耐，愈揣摩到日本AV片商嘅口味，只係因為日本同台灣嘅文化有差別，故此一啲佢覺得會紅嘅女優，未必會喺台灣受歡迎。
從博客「AV No.1」發展到現今嘅「Play No.1」，唔再只係一個純粹嘅AV評論及文化網站，當中仲有唔少AV片商及女優授權商品、人氣AV影碟、情趣用品等一應俱全。不論大家想了解最新嘅AV潮流、女優大小事，以至想睇吓日本最流行嘅情趣產品，都可以喺度搵到心頭好。
網址：www.playno1.com
一劍浣春秋為著名AV評論家及AV專欄作家，至今撰文超過5,000篇，因熟悉日本AV文化及產業，能具體分析並報道AV時事新聞，故有「AV達人」之稱。呢位睇過超過15,000套AV嘅達人，喺佢嘅著作中話畀大家知，自有AV以嚟至今已產生超過10,000萬名女優，AV每年產值超過1,000億日圓，至於點解步兵片比騎兵片好睇、步兵片背後嘅陰謀係乜，以及女優退休後會做乜嘢等，但凡男人想知道嘅問題，佢都以最深嘅方法為大家解釋。
書名：《AV春秋：史無前例！最詳盡的AV研究報告！》
售價：約HK$107
喺訪談中，其實仲問咗好多關於一劍喺AV評論工作所遇到嘅困難，例如好難抽時間同屋企人去旅行。此外，關於日本AV文化嘅問題，例如AV女優嘅供求關係，以至近年日本AV界冒起嘅女同志市場等，可惜篇幅所限，未能盡錄，如果大家有興趣嘅話，可以去官網度睇吓一劍更深入嘅分析。
特派記者：魂