有人話男人飽暖思淫慾，而女人就相反，但係研究發現女士嘅性慾其實飽同餓都係咁敏感。好多男女發展地下情都會用情慾短訊交流，夫婦之間得閒收發情慾短訊亦有助性功用。
有研究指出人喺肚餓嘅時候腦筋會比食飽時更靈活，原來係來自原始求生機制，如果腦筋轉數慢就諗唔到點樣搵食物，好快就會餓死。亦因為咁樣，美國就有人發表出女人喺空肚嘅時候，對於性刺激特別敏感嘅理論，原因係基於肚餓時大腦皮層較為活躍。而美國卓克索大學嘅Alice Ely博士就對此進行過研究。Alice Ely博士搵到兩批正在節食減肥，以及冇節食嘅女士協助，透過儀器監察佢哋嘅大腦皮層活動指數，睇吓佢哋對於涉及浪漫同性愛場面嘅畫面反應有冇唔同，結果發現兩者分別不大。而Alice Ely補充話無論有節食定冇節食嘅女士都好，佢哋食飽之後大腦對性嘅敏感度亦會比平常為高，男人如果有性需要，大可以喺女方剛剛食飽之後示意，發生關係嘅機會就會大大提高喇！
君子之交可以淡如水，但係夫妻同床共寢，關係極其親密，如果要白頭到老充分溝通就顯得相當重要。至於點樣嘅溝通先可以增進夫妻關係呢？「你今晚想食咩呀？」「隨便啦！」「阿仔做晒功課未呀？」「我要煮飯邊度理得咁多呀！」以上嘅對話雖然可以算係溝通，之不過完全流於表面同公式化，要令夫妻感情變得深厚，雙方平時都有情慾交流絕對係其中一個好方法，咁點交流呢？家陣人人都有智能手機，梗係發個情慾短訊以及情慾照片啦。美國一項調查訪問咗870名年齡介乎18至82歲嘅男女，有8成曾經試過發出情慾短訊，當中嘅四分之三會發情慾照片畀自己嘅男女朋友或配偶，而佢哋對於性生活嘅滿足度以及與伴侶嘅親密度評分，都比冇發過情慾訊息嘅高，大家想增進與伴侶之間嘅感情，不妨一試喇。
撰文：賢