你以為成人漫畫唔係一味講愛情，就只係賣弄鹽花場面？其實日本嘅成人漫畫題材有好多，仲唔一定要硬銷肉搏戲，好似呢本嚟自人氣漫畫家唯登詩樹嘅作品《最近這個世界變成只屬於我的東西……》，就係其中一個好例子。事關場面性感香艷之餘，仲玩懸疑劇情，唔知仲以為睇緊美劇呀！
好多人以為做得成人漫畫家，往往係喺全年齡向漫畫中冇出路，或者漫畫功力差，至會選擇呢條路。其實喺現今日本成漫界，有唔少漫畫家本身都係相當有名堂，當佢哋踩入成漫界更係十分哄動，唯登詩樹就係其中一位。呢位喺1956年出道嘅漫畫家，當年剛出嚟做嘢時並非從事漫畫工作，而係一位平面設計師。不過由於佢相當熱衷漫畫創作，加上長期鑽研畫功關係，故此佢經常向漫畫雜誌投稿。
作為平面設計師嘅佢，擅長用電腦進行繪畫，作品亦以美少女題材為主，憑住出色嘅畫功加上古仔吸引，大受漫畫迷歡迎，終於佢決定全身投入漫畫創作，並曾經以加藤雅基嘅名字，推出唔少全年齡向嘅作品，代表作有科幻作品《沙之神 天空的人》，其後又陸續推出《我的雙翼》、《猜猜我是誰》、《再續前緣》、《尖鋒行動》等人氣作品。從事插畫工作嘅佢，代表性畫冊《Yui Shop複製畫集》更被喻為大師級之作。雖然喺全年齡向界別取得成功，但佢亦唔抗拒成人漫畫嘅創作，不過有別一般十八禁漫畫，唔會只顧住炮製鹽花情慾場面，反而更加着重故事性，並以性感香艷場面刺激讀者嘅視覺。
《最近這個世界變成只屬於我的東西……》作為詩樹最新嘅連載成人漫畫，其特別之處並非相當長嘅書名，而係玩懸疑題材。須知道一般嘅成人漫畫少有呢種舖陳極長，同埋冇乜鹽花場面，故此佢嘅出現令人有意想不到嘅驚喜。故事講述女主角美希性慾極旺盛，每日嘅生活不外乎食、瞓、玩同曳曳，而佢嘅宗旨係每日都要跟唔同對手曳曳，先至有存在價值。某日早上佢醒來後，卻發現身處嘅城市竟然一個人都冇。一般人見到咁嘅情況，都會嚇到唔知點算好，但美希卻相當鎮定，認為以後唔使再着胸圍底褲示人（事實上佢喺漫畫中，由頭到尾都飛晒釘出嚟），仲因為以後冇人同佢曳曳而煩惱。正當佢四圍搜集物資之際，遇到一個神秘男子，對方不但樂於同呢位淫娃曳曳，仲提出不如睇吓呢個世界有冇其他人存在，於是兩人就開始一段充滿危機又香艷嘅旅程。故事最特別嘅地方在於解謎元素，不但想知道神秘男真實身份係乜，又想知道呢位索女有乜嘢艷遇，仲想知道點解呢個世界會冇晒人。種種懸疑劇情加上香艷場面，充滿觀賞及追睇性，而作品家陣出到第二集，有興趣嘅話可以買返嚟睇。
漫畫名稱：《最近這個世界變成只屬於我的東西……》
作者：唯登詩樹
出版：集英社
頁數：174頁
撰文：魂