最疊水脫星排名榜

外快搵真銀

全球脫星收入排行榜年年有，但唔好諗住忽然有位新人會打入十大，皆因佢哋搏盡都喺四仔界，頂盡都係代言性玩具，好難話拍廣告入屋囉！而回顧近十年，應該話廿年來，全球收入最高脫星依然係美國四仔女神Jenna Jameson，據統計，阿姐身家達3,000萬美元，成2億3千幾萬港紙，拍四仔都億億聲，點到你唔服先？雖然阿姐早喺03年已全面退出幕前工作，不過佢當年成立成人娛樂公司，做經理人，搞網站，出情趣用品，出自傳、做埋四仔監製，百足咁多爪搵唔到食先奇啦！又所以正確啲講，十年前阿姐已身家過億，今日呢個統計應該係未計息，未計私人投資，純粹係佢公開搵到嘅「外快」咋！

Jenna姐咁疊水，成班脫星身家加埋都唔夠佢鬥啦，唔好話同冠軍鬥，即使同「脫星身家榜」排第10位嘅前脫星Sunny Leone鬥都難，呢位印度妹早就返家鄉「從良」做大明星拍大電影，雖然受盡當地道德之士圍攻，但阿姐身家估計達250萬美元（約1,950萬港元），繼續代言避孕套廣告，做真人騷主持，演出多套Bollywood電影，兩千萬身家計少咗佢啦！

入行難抽身

愈睇脫星身家你就愈葡萄，反而細佬睇到呢班全球最有錢脫星，即係發財都唔會完全離開四仔界，係當事人貪得無厭定外界唔肯放生佢，睇怕佢先知，例如排9位嘅Sasha Grey，性格敢言敢做，身家估計達300萬美元，無正式講過脫離四仔界，得閒又走入夜場做DJ，呢期又跑入大銀幕擔正女主角拍電影，舊年佢就拍住《魔戒》男主角Elijah Jordan Wood拍咗套電影《Open Windows》，奇在阿妹又會上成人電台受訪講性，得閒又客串兩幕網上四仔，有分析就認為Sasha離唔開四仔界係因為陪伴佢成長嘅粉絲實在太多，今日點行點走，根本身不由己喎！

新一代就話擺脫唔到，咁舊一批應該講嘢都大聲啲啦，原來咪又係靠「挑逗」搵食！索到爆嘅Jenna Haze，身家達350萬美元，又有個玩音樂好「老公」，無奈Jenna除咗唔會同其他男女搞嘢外，依舊要賣弄性感吸睛。Katie Morgan身家450萬美元，成名後喪做節目主持，但都要繼續去夜總會出騷繼續喺官網賣鹹相保人氣。排亞軍嘅熟女Tera Patrick，估計身家達1,500萬美元，有自己製作公司Teravision，又曾同潮牌Supreme合作出Tee，今日咪又係拍四仔。相反日本代表，排第5位，身家500萬美元嘅高樹瑪莉亞就真心得多，原為AV女優，04年正式轉型拍電視劇，之後冇走回頭，早前仲進軍電影界，參演日本電影《死目少年》。咪睇佢35歲，今日仲大把粉絲想佢復出（口架）！

霸氣女神 肥瘦佢話事

身為全球最有錢脫星，阿妹由90年代初紅到今日，每次上台依然成為風頭人物，不過未知係咪食好住好，搞到心廣體胖，最近出席公開場合肥咗兩個碼，被傳媒拍到再攞佢舊時索到爆嘅靚偈對比，笑佢醜到冇朋友喎！網民當然唔放過抽水機會喺網瘋傳暴肥寫真啦，之不過見慣風浪嘅Jenna姐真係未驚過，喺社交網霸氣回應網友表示昔日做脫星又話瘦骨如柴無美感，今日珠圓玉潤又嫌我肥，講到尾都係班友仔出於妒忌，本小姐開心使得你哋班口痕友同意咩？

男神身家排行榜

女神就睇完，咁男神又點呢？係人都知四仔界男優吸金能力比脫星低N倍有多，分分鐘砌百鑊先等於脫星一戰，你話點追得到呢？但你以為咁就等於少一半就錯喇，好似十大中冠軍嘅Rocco Siffredi嘅身家竟達2,750萬美元，第二位嘅Peter North都有1,000萬美元，排第8嘅男神James Deen就曳啲，但都有200萬美元，真係唔講得笑（口架）！

10大脫星身家榜

排名 脫星 身家（美元）

1. Jenna Jameson $3,000萬

2. Tera Patrick $1,500萬

3. Jesse Jane $800萬

4. Traci Lords $700萬

5. 高樹瑪莉亞 $500萬

5. Bree Olson $500萬

7. Katie Morgan $450萬

8. Jenna Haze $350萬

9. Sasha Grey $300萬

10. Sunny Leone $250萬

撰文：祖