如果讓一位女士喺獲得一部最新型智能電話，同埋一次同型男曳曳嘅機會兩者之間擇其一，唔知大家覺得佢會揀邊樣？有外國雜誌進行針對女士嘅調查發現，喺超過4,300位嚟自英國、巴西、中國及美國嘅受訪者中，發現大部分嘅女士情願三個月唔曳曳，都唔想三個月冇手機用。對於呢個調查結果，美國四仔脫星Jodie Taylor認為一啲都唔出奇。
Q：唔少性學家曾指出，性生活係男女相處嘅重要元素，只係睇番個結果卻發現，現實生活好似唔係咁，莫非性愛喺現今社會中已唔重要？
Jodie：性愛梗係重要啦！不過喺現今嘅世界中，手機已經係生活嘅一個重要部分，如果冇手機用，試問點可以喺呢個世界生存。當然，有人會話有幾多個人放工後仲會用手機嚟工作呢？須知道我哋社交生活亦好重要，尤其係對女士嚟講，工作之餘同朋友吹水同約會係件好重要嘅事。如果冇咗手機又點得呢？更何況，除咗手機外，作為現代嘅工作女性，睡眠同金錢亦相當重要，因此相對嚟講，性愛呢種唔可以當飯食嘅行為，佢嘅重要性就會更低。不過話說回來，如果冇晒性生活亦唔可能，因為性愛可以令女性緊張嘅神經得以鬆弛，所以佢嘅排名縱然低於手機、睡眠同金錢，卻仍然高於其他嘅。
Q：按你嘅分析，性生活睇嚟不過係種調劑。不過，如果畀你喺性愛、旅遊同購物三者中擇其一，唔知你嘅排名又會係點呢？
Jodie：如果從調劑生活嘅角度嚟睇，我會覺得性愛係最重要，其次先至係購物及旅遊。我會有呢個排序，係因為我覺得購物嘅目的，只不過係滿足自己嘅欲望，應該係咁講，係滿足自己嘅擁有欲。不過呢種欲望係無窮無盡之餘，亦好難搵到真正嘅樂趣，最重要係我買衫、買鞋同買首飾嘅原因，不過係想扮得自己靚啲，從而吸引異性嘅目光，歸根究柢都係同性有關。至於旅遊方面，我諗如果自己間中一個人去旅行，可能會有一定樂趣，只係如果每次都係得自己一個去嘅話，感覺就會唔同晒，試問有乜嘢比得上，可以同個心儀嘅男性，喺異地纏綿一番咁開心呢？當然，我覺得有啲女性未必會咁樣排序，難怪性學家經常提醒大家，性生活喺生活中嘅重要性。
撰文：魂