雖然有人話色情服務自古以嚟都係差唔多，莫不以囡囡為中心，然後等男士盡情發洩精力而已，但話唔可以咁講，縱然最終目的一樣，但玩法卻係大不同。除咗喺玩法上有古今之分，就算唔同地方亦有佢哋唔同嘅玩法，有啲嘢係唔可以一概而論嘅。
如果大家有留意開樓上舖囡囡嘅話，會發現呢期唔單止有唔少新面孔出現，亦有一啲休息咗兩、三個月嘅囡囡蒲頭，感覺上好似旺咗好多，只係究竟乜嘢原因，突然間有咁多囡囡湧現呢？據聞呢個情況係同開學有關。原來呢啲熟悉嘅面孔，佢哋都係介乎於20中到30尾之齡嘅囡囡，由於佢哋當中唔少都其實有仔女，故此喺暑假期間都暫別服務性行業，專心返屋企共享親子樂。及至開學後冇乜嘢需要照顧，因此有時間重出江湖搵食。至於部分新嚟嘅囡囡亦係一樣，趁住呢個機會來港搵銀。當然，有部分囡囡係同傳統嘅問題有關，先至會嚟港搵食，而所謂傳統問題，咪就係香港搵食機會多啲囉！
隨住手機聊天軟件盛行，唔少內地色情服務都會透過呢啲工具搵食，其中一個近嚟喺內地流行嘅方法，就係「租我」嘅玩法。所謂「租我」意思即係有興趣嘅男女，透過呢個網絡假名，就會搵到人肉出租服務，當中包括出租陪傾偈、陪食飯、陪睇電影，甚至陪拍拖等等，而每次出租服務嘅收費從幾十到三百都有。心水清嘅玩家一睇呢啲服務，就知道點會咁單純呢？事實上部分的確係別有「內容」嘅交易，而更多嘅卻係訛騙陷阱。待好色之徒輸入個人資料，好似手機、身高、照片、職業等個人資料，對方就會冇晒下文。須知道現今科技愈嚟愈發達，個人資料亦愈嚟愈重要，大家千祈咪因為一個色字而搞到一身蟻。
台北嘅萬華區竟然開設情色專區？咁咪即係意味住，以後去親港人旅遊熱點西門町，附近都會有合法曳曳嘅地方？大家咪開心住，因為呢單嘢已證實不過係一場誤會。事緣上個月底喺台北龍山國中舉辦嘅「中正萬華復興計劃戶外開講」中，有台灣民眾提議喺萬華區設置情色專區，當時產發局長林崇傑表示市政府已訂定特定行業自治管理條例，有台灣傳媒就解讀成當區將向議會提案喺萬華區設置情色專區。須知道，台灣曾經有段時間有公娼制，亦即係喺受管理嘅範圍內娼妓合法，其後唔少地方開始廢娼，而最後嘅台北市亦喺2001年跟隨。為此，林崇傑喺臉書上澄清法律係要防治色情同賭博而非放寛，亦即係大家唔使有任何幻想。
日本嘅風俗店好多都設有網站，尤其係出名風俗店更係如此，目的係方便玩家先喺網上睇啱心水風俗孃後，跟住再落「柯打」。為咗保障風俗孃私隱，佢哋嘅相片都會打上格仔。不過大家有冇留意，原來關東同關西嘅打格仔方法係有分別嘅呢？據日本嘅風俗業雜誌介紹，關東嘅風俗店往往遮住對眼，而關西則係遮住個嘴。佢哋有咁嘅分別原因有兩個，第一係同歷史原因有關，原來喺20年前政府規定風俗孃嘅相片必定要遮樣，卻冇話要遮邊個部分，因此關東風俗店選擇遮眼，而關西嘅風俗店則選擇遮嘴。第二係同兩地嘅審美觀有關，前者認為大家嘅眼睛係差唔多，故此遮咗無妨，而後者則因覺得就算遮住個嘴，仍然可以睇到樣貌嘅輪廓係點。
撰文：魂