世界難撈！就算上咗位嗰班都唔敢講好風光，何況一批仲喺度力爭上游嘅魚毛仔呢？早前有成人新聞網站食住年終四仔頒獎禮提名名單即將出籠，回顧過去多年最佳脫星獎得主，其中有人歡笑有人愁，但佢哋嘅共通點都係咁辛苦囉！
巴打成日話：難做唔好做！講就易，除非你唔使開飯啦！更何況做過脫星嘅，在公在私都返唔到轉頭，唯一係靠遇到貴人，可以開創一門事業，就好似英國中女Tanya Tate咁，本來只係熟婦脫星一個，但Cosplay成狂，家陣已榮升四仔Cosplay教主，關唔關佢事嘅騷都請佢出席咁咪搵到食囉！
未受承認都撈得咁掂，咁受到行內外都一致認同嘅咪理應發過豬頭？休想，就睇睇早前成人新聞網Die Screaming數盡過去多年嘅XBIZ Female Performers of the Year得主「前世今生」，你就明白女主角只係表面風光。多年來得獎者走嘅路幾乎一樣，而結果都唔係好收場！由08年嘅Eva Angelina，到今年初男優Mike Blue嘅太太Anikka Albrite，心水清嘅巴打必明白頭一年實係威係勢，例如Anikka妹同老公開拍一套「結婚四仔」，跟住連續多套大作擔正，然後又同老公及導演開設新四仔製作公司。聲勢咁響，但有幾多落袋心照啦！
要逐個講一版都唔夠，喺咁多最佳脫星當中，細佬極其量認為只得兩位退休可無憂，但實情又未完全退下「脫星光環」搵食，佢哋分別係2009年女神Jenna Haze及2010年Tori Black，相信90後巴打都必定認識佢哋。無他嘅，人索偈靚，雖然已淡出幕前，但經典四仔不死，加上有鹹網撐住，都唔知稱佢為名人定脫星好。好似Jenna姐咁，2012年正式引退，但2011年初已再無新作，退出後夥拍Jules Jordan開Jen X Studios，親自「揸莊」拍佢嘅四仔，開初好威威，阿妹擔正女主角，四仔主題又話晒事，無奈幾套後就再無更新，睇怕都係賣唔到錢，老闆Jules閂水喉啦！
而Jenna妹則繼續以「前脫星」身份出席各大小活動，到近年積極擺脫脫星身份，喺各大社交網交朋結友，喺YouTube亦有個人頻道，拍音樂mv、惡搞時事等等，原來目的係為「潮人」網站鋪路，阿妹嘅個人網站「jennahaze.com」唔再色情，取而代之係潮流衣着，性感造型，包裝到偶像咁款，賣自家Tee賣海報，講真，搵得幾多吖？
另一女神Tori Black唔使多介紹，退居幕後替四仔廠ArchAngel Video做導演，但市場反應一般，除非阿妹砌埋一份，至於佢最架勢係代言威士忌，有幾多分紅佢就無交代喇！咁其餘又點？亞裔脫星Asa Akira威咗兩年，始終都未搵到新出路，剝開繼續剝。2013年得主Brooklyn Lee，阿妹真係人細樣熟，89年出生，2010年入行砌，話咁快就攞到最高榮譽，來得快跌得更快，報稱因為愛情，唔想再同陌生人交手，同年宣布退出，所有社交網都剷晒，點知眨眼一年又再現「淫」幕，人氣架生已大不如前，仲要做熟婦角色添！2011年嘅Andy San Dimas同頒獎台有緣，但同巴打絕緣，攞完XBIZ同年又攞AVN，咁又點，邊個記得佢個樣？但最最最陰功都係08年得主Eva Angelina ，阿妹打滾12年之多，一直得個做字，砌過嘅對手過千，演出多達500部四仔，幾乎每個巴打電腦都搜尋過佢大名，可惜並未得到賞識，惟有講句，Eva姐實在太「好性」囉！
撰文：祖