最近有套美國英雄漫畫改編嘅電影《神奇四俠》上映，唔知當中四位英雄嘅能力大家鍾意邊種呢？我最鍾意就梗係隱身啦！事關小弟我生得又肥又矮，樣亦甚醜，大家睇我唔到，出街都冇咁大壓力啦！當然，亦有唔少男人鍾意呢種能力，因為可以好似經典情色漫畫《Oh！透明人間》嘅男主角咁，乘自己隱形四圍偷窺搵着數。
睇鹹濕漫畫其實同睇鹹片一樣，唔一定需要肉體橫陳、激情四射嘅交歡場面，有時能夠做到鹹鹹趣趣就已經夠晒過癮，一來可以滿足到男人睇鹹濕嘢嘅要求，二來令作品增加娛樂性。之不過，上述兩個產業近年都愈來愈情慾化，鹹得嚟趣嘅作品可謂買少見少，唔似以前經典嘅鹹趣日本漫畫相當多，《新宿小男人》就係其中一本，至於今日為大家介紹嘅《Oh！透明人間》又係另一部經典。《透》由漫畫家中西安大炮製，係佢嘅代表作品，於1982年開始連載，大家都知啦，當年就唔係咁興精緻畫風，《透》亦一樣，線條比較簡單，風格就好似舊陣時以小朋友市場作為目標嘅漫畫咁，如果唔係揭到去有裸體嘅一頁，可能以為自己睇緊《電子神童》一類作品。之不過佢勝在畫風得意，正好配合本身搞笑而輕鬆嘅劇情。由於作品夠經典，近幾年就兩次被拍成真人版，分別由村上友梨以及岸明日香兩位水着妹做女主角。
《透》故事講鹹濕仔荒方透留寄住喺姑媽屋企，屋企除咗姑丈之外就只得自己一個男仔。某一晚，姑媽炮製咗一餐用醃三文魚子做主題嘅晚飯，本身透留仔雖然討厭食魚子，但係碟碟都有魚子又點避得開。食完之後，透留仔入到廁所就發覺自己除咗套衫之後，全身透明！呢一刻終於可以享受到所有男人都希望有嘅能力。返到學校，透留仔梗係乘隱身之便四圍偷睇女同學底褲同更衣啦。之不過，就發現呢種能力嘅唯一缺點，就係精神太亢奮的話效果會消失！除咗隱身之外，故事主線就係講透留仔與同住嘅美少女萩谷良江發生嘅曖昧愛情，兩人彼此都鍾意對方，但係又難開口，搞笑嘅係兩個都相當主動，然而好多時當良江想搵透留仔嘅時候，個衰仔又早一步食魚子隱咗形喺佢身邊，為免唔好畀良江知道自己可以隱形，呢個時候又要急急諗計令自己興奮繼而現身，過程曲折又搞笑。另外，透留仔隱咗形之後亦會以旁人身份偷睇其他男女發生關係，除咗為作品提供情色場面，仲滿足晒讀者嘅偷窺慾望。
撰文：賢