紋身被稱為藝術一種，而紋身亦可以展現當事人誘惑一面，點展現？當然要有紋身男女，再加位專業攝影師，咁你同我先睇得到啦！自稱以紋身攝影為志趣，廣受紋身人士尊敬嘅Justice Howard，阿姐年過半百，多年來替成千上萬紋身男女拍攝紋身寫真，亦替多本國際雜誌操刀拍攝內容，近年，為記錄美國紋身文化有幾百花齊放，阿姐決定製作一本紋身寫真集《Revelations: The Photography of Justice Howard》，據指花上三年時間資料搜集，拍攝52位喺社會不同界別，極具代表性嘅紋身Model，當中有男有女有老有嫩，職業亦無分貴賤。據Justice Howard表示紋身喺全球各國早已由地下走到地上，紋身部位亦由手手腳腳引伸到其他「敏感」部位，可惜呢本寫真集就冇「特別部位」紋身，不過都有大量性感晒咪靚相。想知佢利用鏡頭展現紋身嘅神秘、誘惑以及強韌一面，買本參考吓囉！