日文「一番」，音似「一支棒」，即係好正咁解，雖然男人支棒棒不同此棒，但係都會令唔少女士面紅兼心跳加速。不過大家咪以為只有女士會對棒棒動容，喺一啲你估唔到嘅場合，可能會因為一支棒而令各位男士啼笑皆非，試問大家又點諗得到，一宗交通事故竟然會同支震棒有關呢？
各位駕駛人士每當遇到塞車時，會做啲乜嚟打發時間？姑勿論大家做啲乜，都唔會學似呢位英國女士咁，竟然拎支情趣按摩棒出嚟自娛，結果造成追尾事故咁誇張。話說喺今個月中，英國嘅格洛斯特郡一位海鮮送貨員，首日返工即發生交通事故，佢架貨車被後車撞毀車尾。送貨員以為會因此被炒，點知公司老闆笑稱唔係佢嘅錯。原來老闆翻睇貨車尾嘅行車記錄儀，發現後車女士懷疑因塞車太無聊關係，竟然拎出一支「兔仔按摩棒」出嚟自娛，結果煞唔切車而出現意外。現海鮮公司將呢個事故交畀保險公司處理，唔知呢位女士會唔會解釋點解佢用棒棒解悶呢？
家陣所謂純天然嘅情趣按摩棒，都係以天然質料造成，只係講到純天然，又點及得上呢支日本冰製按摩棒咁晶瑩剔透呢？話說今個月初日本有位女網民造訪朋友屋企，諗住打開佢雪櫃個冰格搵冰整冰水飲時，卻意外發意冰格竟然有支透明情趣按摩棒！大吃一驚嘅佢望真啲，先至發現原來所謂按摩棒，其實係一支冰棒而已。又唔怪得佢被嚇親，皆因支棒嘅外形真係栩栩如生，就連大小亦同真男人棒棒差唔多。被冠以「卑猥藝術品」嘅照片分享上網後，唔少網民都大呼神奇。不過大家卻忘記一點，就係呢支棒之所以由水滴變成長棒，係經過無數日子嘅冇清理冰格所致，睇嚟呢位女網民嘅朋友，應該唔係幾打理家居衞生。
身材健碩嘅脫衣舞男最耍家嘅表演，莫過於喺舞台上除衫騷肌，以展示佢哋肌肉美感，從而博得台下女士嘅狂呼尖叫。不過根據一項研究顯示，原來呢個並唔係佢哋除衫嘅唯一原因。美國科羅拉多州大學丹佛分校嘅專家Maren Scull經過兩年嘅研究，發現舞男不但唔計較被物化，仲認為跳脫衣舞有征服女性嘅感覺，並從中獲得自信，尤其係剝衫之後，聽到女士嘅呼聲及狂熱嘅視線，更係有種滿足感添！研究又指，脫衣舞女郎嘅感覺則相反，認為自尊及自信心受打擊。不過話又說回來，研究舞男嘅剝衫心理真係咁重要，同埋需要兩年時間去進行咩？
撰文：魂