點樣先至可以將大家覺得冇可能嘅嘢變成有可能呢？最重要就係有諗頭！只要有諗頭，真係乜嘢事都可能變成事實，就好似英國有個大學生為咗攞高分，竟然畀佢諗到香艷奇招；而加拿大有位殘障女士就話同樣可以開性愛派對！最重要係有諗頭嘅話，甚至可以自製鑑別精液神器添！
邊個話身體健全嘅人先至可以參加性派對，加拿大就有一位殘障女士舉辦一場專為殘障人士而設嘅性派對。呢位今年35歲嘅輪椅女士Stella Palikarova，夥同另一位殘障男士Andrew Morrison-Gurza，將於今年8月喺多倫多嘅Buddies in Bad Times劇院，舉辦一個名為「Deliciously Disabled」嘅性愛派對。據佢解釋舉辦是次活動嘅原因，除咗想扭轉一般大眾誤以為殘障人士冇性慾嘅諗法外，仲因為好多性愛派對完全冇諗過畀殘障人士參加。場地至少容納125參加者之餘，現場仲提供手語翻譯服務，就算失聰人士亦可以參加。
智能手機嘅功能愈嚟愈勁，不但取代咗日常電腦使用，原來佢仲可以化身成鑑定精液嘅神器添！首先大家要準備一部具有閃燈功能嘅智能手機，另外仲要準備透明膠紙、藍色同紫色油性筆各一支。方法係先喺閃光燈上黐上膠紙，然後用藍色油性筆喺上面上色。跟住再黐一張膠紙喺上面，用紫色油性筆再喺上面油上顏色。最後拎住手機走入熄咗燈兼黑麻麻嘅廁所，對準廁座咔嚓一下，佢上面嘅精液就會無所遁形。據講精液中嘅特殊物質會吸收紫外線，因此會發出明顯嘅顯影，而除咗精液外，汗水同尿液同樣會有咁嘅效果。不過係咪真係得，就真係要試過至知。
講到讀書兼攞高分，除咗苦讀同硬記外，究竟仲有冇其他方法呢？英國卡迪夫大學嘅21歲應屆畢業生George就爆料，佢之可以一級榮譽文學士身份畢業，全靠喺學校嘅圖書館同女友曳曳。據佢講以前冇乜動力讀書，其後發覺喺圖書館同女友曳曳感覺相當刺激，不但令佢鍾意咗呢種玩法，更成為佢去圖書館嘅動力，更話最愛曳曳嘅地方，就係校內嘅圖書館Bute Library。事關呢個兩層高嘅圖書館二樓，擺放大量莎士比亞嘅書，既方便喺書架上曳曳，又可以喺激情過後順便拎本書嚟讀。佢又話雖然好驚被捉，但好肯定佢唔係唯一一個咁做嘅人喎！
撰文：魂