好多日本情色漫畫同AV一樣，交歡場面有時嚟得好突然，甚至係無厘頭，令男女主角好似為做而做，激情有餘而感情不足。之不過，又有唔少情色漫畫有紋有路，唔單只交歡安排合理，情感表達描述適當，仲要有教育意義添！呢套就係《夫妻成長日記》喇！
漫畫可以分兩個方向去欣賞，一係睇畫功，二係睇劇情，如果漫畫家能夠將兩方面都妥善兼顧當然係最好，但要我喺兩者之間作出選擇，就會比較注重劇情，特別係睇情色漫畫，點解呢？睇鹹片都希望睇高清版啦！唔通畫面矇查查會好睇咩？我嘅意思係漫畫唔需要太仔細，如果畫到真人一樣，咁我不如睇由真人交歡嘅AV啦！而畫作線條簡單，一樣可以令作品將鹹味發揮，《夫妻成長日記》就係喇！《夫》由1997年喺日本連載到今時今日，推出嘅單行本超過六十本，係漫畫家克•亞樹嘅得意之作，亦可以話係佢最為人熟悉嘅作品。克•亞樹嘅畫功唔算一流，但線條簡單，睇落風格有少少似《亂馬1/2》，簡單勾畫出嘅男女胴體卻係易睇易明，當佢哋進行交歡動作就更加容易將當中嘅鹹味同猥褻感表達，好過好多懶係畫得仔細，將男女角畫成一團肉嘅情色之作。
《夫妻成長日記》係台灣譯名，香港就將佢譯為《兩人性世界》，個人就覺得前者譯得最貼切，亦可以反映出男女主角之間嘅夫妻關係以及圍繞二人嘅故事發展。《夫》故事講述男主角小野田真任職化妝品推銷員，乃係怕醜仔一名，由於唔識追女仔而需要靠相睇結識異性，而其中一次相睇就識到女主角河田優良。河田優良年輕貌美，氣質美艷而溫文，身材相當豐滿，之但係同男主角一樣咁怕醜，甚至覺得做愛係羞恥嘅行為。二人結識之後頓覺一見鍾情，一年之後就結成夫妻。由於二人俱係處子之身，又對性了解不足，初頭嘅夫妻生活相當拘謹，之但係阿真又好多性幻想，想同老婆行埋又冇膽，搞出唔少趣事。後來，優良了解到夫妻生活，性愛亦好重要，故不斷嘗試同老公仔探索性行為，仲共同鑽研夫妻相處之道，對新婚夫妻起到唔少提點作用。另一方面，漫畫嘅交歡場面除咗來自男女主角，其身邊人亦有描寫，由前戲到埋牙激戰都有仔細刻畫，加埋抵死又露骨嘅對白，令作品更添鹹味亦值得回味。
撰文：賢