家陣歐美四仔發展似乎落後於日本，原因我相信係歐美四仔來來去去都係肉體橫陳再加上連場激戰，睇得多只會令眼睛感到疲勞，相反日本嘅AV則注重氣氛營造，有故事性加上服裝配搭，睇落刺激眼睛嘅元素更多。同樣地，日本經典嘅情色漫畫唔使裸露，好似知名漫畫家桂正和嘅經典之作《I"s》咁，一點不露亦可以令大家想入非非。
日本漫畫嘅尺度比香港寬鬆好多，當中出現嘅血腥及色情場面亦甚具刺激性，有時為咗滿足讀者嘅要求，可能仲會喺冇乜需要嘅情況下加插激情全裸性愛場面，好似小弟至愛嘅《烙印戰士》咁，交歡場面嘅激情度堪比正宗色情漫畫。之不過，係咪一定要裸體先可以為讀者帶來誘惑呢？答案係否定嘅，日本漫畫家桂正和就話畀我哋知色誘根本就唔需要裸露。桂正和1980年憑作品《翼》獲得第19屆手冢漫畫賞佳作獎，之後喺1981年又以《轉校生》入圍第21屆手塚漫畫獎。而佢出道以來作品唔少，相信好多漫畫迷都仲記得佢嘅《電影少女》以及《DNA2》等，今次就為大家介紹描述校園愛情嘅《I"s》呢部經典之作。據聞佢嘅情節之所以咁令人刻骨銘心，全因桂正和本人冇乜異性緣，喺冇幾多次談戀愛嘅情況之下令佢可以發揮對愛情嘅幻想。咁又係，幻想係美麗，現實係殘酷，拍過拖嘅人都應該知道愛情並非想像中美好同如意。
《I"s》故事講述高中生男主角瀨戶一貴暗戀同班校花葦月伊織，雖然一往情深，但起初就因為怕畀人知道暗戀對方，而扮到好討厭伊織，形成歡喜冤家情節。另一方面，一貴天生相當得女性歡心，同伊織發展感情期間又有唔少異性向佢表示傾心，好似麻生藍子、磯崎泉、秋葉季子等，情節又出現不少誤會、錯摸從而製造出劇情高潮，亦同時感受到在學時期挫折同尷尬事多多嘅初戀往事。故事由主角們讀高中講到讀大學，後來到大家出社會工作，最後仲出現暗殺危機添，結果就係男女主角大團圓。睇到呢個簡介，大家以為故事相當正路，有乜理由會有情色元素呢？咁就錯喇！眾多女角好多時都會被偷窺、跌落水、剛剛沖完涼走出嚟等，桂正和喺繪畫呢類場面時所用嘅筆觸相當仔細，即使有衣服包住女角嘅身體，大家都可以睇到其曲線，不少場面女角嘅內衣褲同身體都若隱若現，加上男女間情到濃時動作，令人睇到心癢難耐，呢一點亦正係桂正和將純真感情與情色元素拿捏得恰到好處嘅大師級表現。
撰文：賢