最近有新聞報道指出，做豬肉佬月薪唔低，但係年輕人嫌辛苦同污糟而唔肯入行。問題又引伸到唔少行業都有青黃不接嘅情況，喺日本AV界同樣有類似問題，除咗AV男優嘅精力唔多夠，編劇們嘅創意亦甚缺乏，剛剛慶祝成立20周年嘅特攝片大廠GIGA就特別向大家嘅創意招手喇！
雖然小弟自問唔係日本特攝片粉絲，但係由於小時候無幾多娛樂活動，放假朝早起身都只係睇電視。如果閣下同小弟一樣咁上下年紀，又做住同樣嘅事，咁你一定睇過唔少特攝片。例如《乜乜戰隊》、《物物超人》故事係就係大同小異，一樣係戰隊超人打怪獸保衞地球，但喺角色設計、武器同怪獸設計上就層出不窮。特攝片創意是否江郎才盡就唔知，但係專門拍特攝式AV嘅片廠GIGA就顯得有少少技窮喇！不過唔緊要，因為創意一直都喺民間，深明此理嘅GIGA就舉辦「第一屆GIGA角色插圖大獎」，向充滿創意又對特攝片有熱誠嘅朋友招手。呢個活動由即日起至6月30日接受各界人士參加，大家可以將自己設計嘅角色，如正派女主角，以及邪派嘅女魔頭等，透過http://www.giga-web.jp/index.php遞交插圖。GIGA表示參賽嘅插圖會經過嚴格挑選，被選出嘅就會搵AV女優扮演，並拍攝成為真人版特攝式AV作品。另外，GIGA表示邪派角色比較渴市，希望大家設計多呢類角色。至於有咩獎品呢？官方暫時未有提及。
除咗角色設計之外，GIGA同時搞咗個招聘活動，招請大量創作人才，包括編劇、攝影師及助理編導，希望可以將新元素注入作品當中，繼續為AV迷帶來無限驚喜。適逢GIGA今年踏入20周年，除咗上述活動之外，GIGA特別製作咗一個重頭系列，名為《美少女戰士V》。呢個系列可以話係GIGA有史以來最強巨製，出動5名AV女優扮演一隊美少女戰士，計埋兩名奸角女優，一共有7位咁多，陣容包括星空萌愛、玉城麻衣、彩音遙菜、高山繪美里、鳴月藍、真木今日子以及竹內真琴。除咗女優人數多，運用嘅電腦特效亦同樣又多又耀目，絕對係近年佳作！
有正就有邪，特攝劇集入面嘅戰隊同超人雖然武藝高超，武器又精良，但係都要壞蛋怪物畀佢哋收拾先有表演機會。有時做反派角色亦相當惹人注目，近幾年嘅戰隊片集當中更加有一位知名度極高嘅AV女優成功登陸，扮演反派角色，呢位就係由AV女優成功轉型為演員嘅及川奈央喇！及川奈央性技超班，演技一樣高水準，乃係廣大AV迷一致認同嘅AV天后，從良成為演員之後演出機會無數，2008年更加有份演出特攝片集《炎神戰隊轟音者》，奈央唔係做戰隊成員，而係做邪派角色害水大臣凱格雷西亞，一做就做咗三年多至退場。本身已經靚到絕嘅奈央喺片集當中打扮妖艷，令人眼前一亮，帶淫邪嘅笑容相當誘惑，絕對係一位成功嘅奸角，後來者往往難以媲美。
撰文：賢