早前泰國嘅傳媒報道，指香港有位女士於清邁一個違規場地玩「光豬跳」，結果被拍影片兼畀人擺上網不特止，仲驚動到當地警方及中國領事館，呢勻真係手尾長。其實想裸體玩樂唔係咁難，事關呢個世界有好多既合法又玩得刺激嘅地方，今勻就帶大家玩盡海陸空啦！
玩「笨豬跳」都要搞到剝晒衫咁興奮，若然玩埋高空降傘嘅話仲得了？呢個名為裸體跳傘促進協會嘅組織，就專門提供一個咁激嘅玩法畀裸體愛好者。據呢個喺2010年11月成立嘅協會介紹，宗旨係「Because We Can」（因為我哋可以）即係以挑戰自己為目標。為咗滿足鍾意跳傘又唔鍾意着衫嘅玩家，佢哋便組織呢個協會，不但從全球招收會員，並且定期舉辦跳傘活動，等大家可以裸住嚟跳兼交流心得。雖然唔知有乜心得可以交流，但確實有唔少地方嘅人加入。不過想成為會員一啲都唔易，首先係具有跳傘經驗，其次就係夠膽喺大家面前裸體。
想攞正牌喺大街大巷剝光豬踩單，係咪一世人都冇咁嘅機會？梗係唔係啦！世界裸體單車遊行組織話畀大家知，唔單止可以喺街上裸體，仲可以踩住單車聯群結隊咁遊街添！雖然呢個係可揀着或唔着衫嚟踩單車嘅國際性組織，但佢嘅口號卻係「Bare As You Dare」（你夠膽就剝光豬），既然人哋都咁講，梗係要剝衫嚟回應吓佢。不過話又講番轉頭，話佢哋只不過想玩裸體其實又唔係咁啱，事關喺2003年舉辦首屆裸體單車遊行時，係以反戰為活動主題。時至今日，全球各地都有佢哋嘅分會，而每次舉辦地方活動時，主題亦會同環保、自由、時事等有關，絕對係裸得有意義。
唔好話裸體潛水，若然喺海灘裸泳嘅話隨時會惹嚟官非。其實裸潛唔使吓吓提心吊膽驚畀人告嘅，好似位於牙買加嘅著名裸體度假村Hedonism II，就提供一個名為「Hedo Diver」嘅裸體水肺潛水玩法，畀既想一嘗裸潛滋味，又想親近海底世界嘅玩家。佢哋嘅服務相當周全，除咗提供專業訓練外，仲有齊各種潛水設備，而潛水教練亦會跟足全程。另外更有兩種唔同深度，分別為30至45英尺同埋60至100英尺供玩家選擇；前者每次裸潛時間約為20至25分鐘，後者則為30至40分鐘。佢哋介紹裸潛嘅好處，就係可以透過全身感受水底世界，尤其係當身體貼近海洋生物，例如海豚、海龜同八爪魚等時，呢種體驗更係難忘。
唔少香港人鍾意行山，只係講到裸體行山就真係咪制，萬一畀人見到真係後果難料。不過對於呢班德國人嚟講卻冇有怕，每次嚟親呢度行山例必剝光豬，點解？咪就係因為當地有條合法嘅裸體行山徑囉！話說喺2010年5月1日，德國政府宣布開設全球首條合法裸體行山徑，等全國約5萬名天體愛好者，有一個休閒好去處。呢條位於中北部城市Dankerode及Wippertalsperre之間嘅行山徑，全長約為18公里，沿途不但有河流同樹林，更有靚爆鏡嘅哈茨山脈（Harz Mountains）美景。此外，有關當局更相當細心，喺行山徑嘅每個入口都設有告示牌，提醒非裸體愛好人士注意，路上可能會遇到唔少光脫脫嘅人。
撰文：魂