人奶原來可以用嚟攻擊人，澳洲就有個辣媽因為用乳汁襲警被捕。有情侶喺美國嘅遊樂場玩車震，吸引大批小童圍觀，最後更引嚟警方干涉。台灣有個教授指出，想戒煙嘅朋友，除咗遠離香煙之外，仲要遠離美女！
澳洲有個26歲嘅辣媽，喺商場行行吓時畀警察截停搜查，可能懷疑佢偷東西，所以帶咗佢去隱蔽處進行搜身，最後女警認為未夠徹底，於是要呢位辣媽脫得光光嚟搜，辣媽當然反對！但肉隨砧板上，惟有照做，最後乜都搜唔到，當辣媽着衣服時唔知係咪脹乳定係有心作弄警員，竟雙手用力一擠胸部，乳汁就直射而出，射到女警滿面都係，最後辣媽被控襲警罪，事後辣媽點樣冇人關注，反而唔少巴打都想畀人用乳汁嚟襲擊一下喎！
美國佛羅里達州有個遊樂場，每日吸引唔少大人細路嚟玩，話說較早前有對情侶，唔知係咪玩得興奮得滯，喺停車場自己嘅小貨車內激戰起嚟，好衰唔衰畀一班小朋友走過發現，小朋友定足觀看，兩人發現後就把小朋友驅散，於是兩人繼續大戰，小朋友離開後冇掛住玩，反而馬上報警，警察到達後兩人仲未分勝負就要停止，仲控告兩人公眾地方行為不檢。網友睇到新聞後，奇怪兩人大戰嘅時間實在太長，唔畀小朋友見到，都一定畀其他人發現！
睇見美女原來係會令你食多咗香煙！台灣有個教授就以呢個主題做咗個研究，佢搵嚟76位老煙槍，佢哋個個都煙不離手，之後把佢哋分為兩組，一組就畀普通女性照片佢哋睇30分鐘，另一組就畀美女照睇同樣嘅時間，結果指出睇美女照嘅一組，比睇普通女士照嘅一組，多抽咗2.08支香煙，差唔多一倍有多，所以教授認為愈睇得多美女，就會愈想吸煙，所以呼籲要進行戒煙嘅朋友，除咗要遠離香煙嘅誘惑之外，最好就係遠離埋美女嘅誘惑！
撰文：小德