如果話色情電影女星Nina Hartley嘅演藝生涯充滿傳奇，真係一啲都唔過分。事關佢從當初嘅脫衣舞娘，變成色情艷星再轉戰四仔界，演出超過一千套作品之餘，鏡頭以外更係一位女性主義者、性教育家同作家，單係呢種種變化，就已經係戲味十足！
Nina Hartley喺1959年3月11日於美國加州出生，原名Marie Louise Hartman嘅佢同埋家姐及兩個哥哥，跟隨父母移居三藩市。1977年喺當地高中畢業後，進入三藩市州立大學附屬護士學院修讀，不但以優異生身份畢業，更喺1985年於加州獲取註冊護士資格，咁高嘅學歷喺當時嘅色情電影界中相當少有。點解咁講呢？原來正當仲係學生嘅佢，喺1982年時開始喺劇院Mitchell Brothers O'Farrell Theater表演脫衣舞，而為咗遷就入場嘅日本觀眾，佢改咗個相當有東洋味嘅藝名Nina Hartley。及至1984年進軍色情電影界，並擔綱演出處女電影《Educating Nina》，憑住藍色眼睛及纖腰，以及佢標誌性圓渾美股令電影相當成功。
雖然佢冒起得相當快，但當時由於要兼顧學業關係，故此電影演出並唔算多，及至佢畢業後先至正式全身投入艷星工作。不過，由於當時色情電影開始沒落，令佢不得不轉向四仔影帶發展。憑住出眾嘅外形，佢嘅作品極受歡迎，喺1987年憑住四仔影帶作品《Debbie Duz Dishes》喺AVN頒獎禮中獲得最佳脫星殊榮，其後喺1989年憑住色情電影《Portrait of an Affair》獲得最佳女配角脫星，1994年更進入Legends of Erotica名人堂。及至2013年正式引退期間，總共演出過1,028套色情作品。除咗色情事業獲得極大成就，出名敢言嘅佢更係女性主義者，經常發表關於女同性戀嘅意見。另外佢又以性教育家身份出席各種演講，並曾於美國著名清談節目《Oprah Winfrey Show》，談論成人業界嘅濫藥問題。
撰文：魂