道德社會，總係打壓色情界，不論你係性工作者或提供色情資訊媒體，要生存比一般人更艱難！但其實成人娛樂係男女生活一部分，無論你喜歡與否都有存在價值，美國就有位作者敢為色情界發聲，開設網站及出書談及成人界鮮為人知嘅一面。
外界總認定色情界工作者淫亂低俗，自我價值低，但喺作者近10年臨床觀察所得，事實台前幕後大部分人對生活及對工作都有抱負，佢哋一直默默耕耘用行動去改變大眾偏見。
作者Chauntelle Tibbals係公共社會學系博士，專責研究流行文化，當中包括性文化，多年來受訪無數次，亦曾喺「Playboy.com」撰寫兩性專欄，又為人體藝術網站擔當顧問，早前更將歷年來訪問收集於個人網站「ChauntelleTibbals.com」同外界免費分享，而今次推出新書《Exposure: A Sociologist Explores Sex, Society, and Adult Entertainment》目的係要令各界深入了解色情工作者同你我一樣光明正大，生活或工作都唔神秘，同樣有喜怒哀樂，片場開工亦會受情緒化影響，脫星間如何明爭暗鬥上位、脫星如何面對群眾壓力、脫星看脫星等，喺書內都會一一探討，全書192頁雖然字多圖少，但全部以第一身業界人士爆料，加上權威作者分析，睇完或者你都會對四仔界改觀！
書名：《Exposure: A Sociologist Explores Sex, Society, and Adult Entertainment》
售價：約HK$116
撰文：祖