做得模特兒理應天生麗質，對自己嘅外表要信心爆棚，否則又點襯得起身上嘅衣服或者手上嘅產品呢？今日就介紹一位嚟自台灣嘅人氣新秀畀大家認識，佢就係林茉晶，但原來靚女之前對做呢行，係一啲信心都冇！
好多囡囡做得呢行，自小就對自己嘅外表充滿信心，但林茉晶就好唔同，佢話自己從小就唔覺得靚，後嚟做外拍模特兒，都係畀朋友逼上轎嘅！拍完之後，自己仲好擔心會畀人鬧佢唔夠靚或者唔夠專業，但最後冇人鬧佢，反而不斷獲得朋友同網友嘅認同，令佢膽大起嚟，後嚟做埋展場嘅騷女郎。由於林茉晶樣子清純，加上身材高挑，喺展場上深得龍友嘅歡迎，反應愈嚟愈好，為咗進一步考驗自己，就參加台灣當地嘅大型選秀比賽，磨練膽量，突破自己，佢話最大考驗就係天才表演，平時卡拉OK都唔敢唱，但要佢喺會場對住幾百人唱歌，真係好大壓力，曾經想過唔再比賽落去，但最後得到朋友鼓勵，咬緊牙關，自此就克服咗喺人面前唱歌嘅陰影！
近年林茉晶更不時以性感形象示人，拍咗多輯性感寫真，令佢嘅人氣大大提升，係時候要向其他領域發展，由於佢好喜歡睇恐怖片，有記者問佢會唔會接拍恐怖片，佢話真係好驚，所以未必會拍！至於佢嘅另一愛好，就係食嘢，有人問佢會唔會做美食節目主持，佢又話唔會，因為怕日食夜食，身材會走樣喎！身高173cm嘅林茉晶，上圍係32吋C級，腰圍係24吋，下圍係35吋，數字上一般，但拍寫真出嚟嘅效果真係十分誘人，性感度極高，有啲寫真照更令人鼻血長流，所以身材走樣，唔只佢接受唔到，連粉絲都一定接受唔到。至於問到目前仲係單身嘅林茉晶，喜歡邊啲男士？佢話要細心體貼、心口有啲胸肌，身高要高過佢，唔使太有錢！咁簡單，一定大把人喺門口排晒隊啦！
出生地：台灣
三圍：32-24-35
身高：173cm
簡介：林茉晶的面書收錄咗佢好多噴血寫真同埋生活近照，好多相都好性感，但更多係好可愛，從中大家可體會出林茉晶嘅開朗個性，令人百看不厭！
網址：http://www.facebook.com/LIN.MO.JING
撰文：龍四海