正所謂「天有不測之風雲」，拍拖拍咗好多年嘅朋友，咪以為戀情穩定，一定打風都打唔甩，好似台灣藝人「寶媽」便剛剛結束「姊弟戀」，睇睇佢生肖，原來屬羊，咁就難怪囉！據師傅講，今年有3個生肖嘅朋友感情運出現變數，好易甩拖，所以今日就逐一分析吓，希望大家及早籌謀，早作準備！
師傅話屬羊嘅朋友今年有粒「華蓋」入命，能獨當一面，出人頭地，但同時會比往年落更多心血在工作上，所以一時不能兼顧感情，好易出現危機，而且又犯太歲，身邊繁鎖事一籮籮，如果另一半煩埋一份，自然難免吵架冷戰，再加上屬羊嘅朋友今年爛桃花多到不得了，你意興闌珊去酒吧飲杯酒，估唔到都會有奇遇出現，如果一時把持不住，難免千年道行一朝喪，所以屬羊嘅朋友真係要小心，少為自己多為另一半着想，莫因小事而破壞一段大好姻緣。
屬蛇嘅朋友今年財運不俗，但對身邊嘅人，無論係同學、同事，甚至親友都好，總係問題多多，人際關係差到不得了，感情生活更要小心觸礁，大好姻緣也斷送！最主要原因係火蛇遇着乙木流年，木生火旺，火氣十足，見到乜嘢都會唔滿意，好易衝口而出，絕對係「吵架年」，為免破壞感情，可以出門旅遊化解，加上今年驛馬星動，出門多啲反而有利，但小心次次都帶女朋友出門或一次都唔帶佢出門，都好易出事，所以過猶不及都係唔好，屬蛇嘅朋友真係要好自為之！
與屬蛇一樣人際關係極差嘅仲有屬雞嘅朋友，佢哋今年有好多凶星出現，都係影響人際關係，加上遇正「寡宿」，自我意識高漲，乜都覺得自己啱晒，夫妻感情生活難免受到影響。拍拖一段日子嘅朋友，亦會因「寡宿」嘅出現而日日吵架冷戰，感情亦會因此而變淡，甚至有分手嘅可能，凡事記緊忍讓，以和為貴。同屬羊朋友一樣，今年屬雞嘅朋友爛桃花遍地開花，小心行差踏錯，搞到一失足成千古恨，所以都係把心思寄情喺工作上好啲！
異性運：虎、龍、羊
桃花運：狗、兔、猴
和合運：馬、狗
玄學提供：寶源師傅
撰文：小德