人馬座嘅朋友今年絕對係愛情路上嘅收成期，拍緊拖嘅朋友，今年好有可能拉埋天窗，結束愛情長跑；至於未有另一半嘅朋友，記住暑期假間出外走走，話唔定良緣天降，真命天女或者白馬王子就會突然喺眼前出現。
由於今年人馬座嘅朋友桃花運特別旺盛，所以亦要小心爛桃花，特別係20歲以下嘅年輕小姑娘，正值戀愛嘅季節，但因為經驗不足，所以好易誤交損友，至於稍為年長嘅朋友亦咪大安旨意，因為你哋亦問題多多，否則亦唔會多年來都冇一個固定伴侶，所以今年桃花運轉好，選擇出現多咗，係要你哋好好選擇，而唔係叫你哋亂嚟，否則受傷害嘅都係自己！至於邊啲月份最適合出手，由2月開始直至8月運氣不錯，特別係踏入5月更係桃花朵朵開，至於最好嘅地方，建議都係同花花草草有關嘅地方，例如公園、郊外、大草地等，你嘅另一半就會喺呢啲地方出現，由於對方喜歡戶外活動，所以就算陽光幾曬都好，咪把自己包到冚，多展露你陽光開朗嘅一面！
至於已經拍拖嘅朋友今年好有機會拉埋天窗，因為星盤中出現有變化的元素，令你愛情路上有所變化，所以唔想甩拖就要結婚，但結婚前總要求婚，求婚最好喺2月、3月和8月，一般情況下對方都會答應，答應後最大問題反而係人馬座嘅朋友，因為你最怕做啲細眉細眼嘅事，但點唔滿意都好，咪抱負面訊息，否則婚姻會受影響，有朋友嘅多搵朋友幫手，有錢嘅咪多搵公司負責囉！家陣結婚仲使乜自己籌辦呀！至於結咗婚嘅朋友感情會有增無減，但同時你愛心爆棚，一不小心便會把愛意釋放出去，所以要慎防有第三者出現，變化嘅星可助你變好，亦可以令你變壞，是好是壞，全憑自己一心決定，已婚嘅人馬座朋友真係要好好執生，至於第三者會否真愛？唔使諗！咁浪漫嘅嘢冇你份！
最佳數字：2、4、8
最佳顏色：青綠色
最佳寶石：綠寶石、玉石
最佳位置：草地、郊外、花園
狩獵運：3.5
甜蜜運：5
戰鬥運：4
撰文：小德