上個星期係廿四節氣中嘅「驚蟄」，傳統命犯小人嘅朋友就要去祭白虎同打小人，但小人嘅嘢真係好麻煩，有時打極都有，令人防不勝防！今日就搵嚟寶源師傅講吓今年邊3個生肖最容易犯小人，等大家提防一下，免招是非！
師傅話屬兔朋友今年吉星高照，應該諸事吉祥，但有兩粒凶星不可不防，就係「五鬼」和「飛符」，呢兩粒正一係是非小人星，咪睇輕佢哋，如果任由佢嚟騷擾，輕則身體健康受損，重則會招惹官非，所以屬兔嘅朋友今年喺愛情事業兩得意嘅同時，都要諸事謹慎不可得罪人，正所謂唔怕得罪君子，最怕得罪小人，因為有呢兩粒凶星推波助瀾，所以小小事都會借傷成毒，萬事都以和為貴，切勿一時得意忘形而招惹小人纏身，此消彼長，好運會因而大減！
屬牛嘅朋友今年係沖太歲，本身都已經和流年吉星相沖，頭腦思考已經冇平時咁聰明醒目，其他有力嘅吉星又欠奉，反而凶星有幾粒，都係不利屬牛朋友嘅發展，有部分會以外來環境來阻撓你，但會有更多化為小人嚟考驗你，所以今年你身邊嘅小人真係去到邊都總有一兩個，但別對親友感到失望，因為你嘅固執和失敗，係由於對自己太過自信，不肯相信別人，所以今年如果遇上解決唔到嘅難題，不妨搵親友打救！
屬狗嘅朋友今年有兩粒吉星輔助運氣很不錯，但同時有兩粒凶星，一粒係「寡宿」，另一粒係「捲舌」。「寡宿」出現會令驕傲嘅人更驕傲，對人做事都會變得獨斷獨行，因此自然稱呼人少得罪人多，加上仲有粒「捲舌」星，加強你嘅吵架能力，小小事都會大吵大鬧，就算現場鬧唔成，對方都會背後落你藥，講你壞話，以致中傷誹謗不斷，但如果屬狗嘅朋友情緒方面可以控制好啲，萬事都先讓人一步，人際手段圓滑一點，咁就會諸事大吉！
異性運：豬、虎、龍
桃花運：兔、馬、狗
和合運：羊、猴、牛
玄學提供：寶源師傅
撰文：小德