正所謂「新春行大運」，相信唔少巴打都發咗新年財，身上有幾個錢，就難免想「任性」一下，而今年邊幾個生肖會容易發大財兼可以任意地揮霍呢？今日就搵嚟玄學師傅，等佢講解一下邊三個生肖最有本事任性！
天生愛玩嘅屬猴朋友，佢哋今年有貴人星入命，財運方面絕對係得心應手，手頭鬆自然玩得盡情，搵幾多使幾多，絕對係任性代表，但咪先使未來錢，否則到咗年尾運氣一轉，到時入不敷支咁就會非常頭痕，加上今年屬猴朋友有紅鶯星同紅艷星入命，異性緣前所未有咁興旺，囡囡一打一打咁出現，所以使錢一定會係倒水咁樣，但小心遇上爛桃花，使身上有嘅錢嚟識女仔就冇所謂，因追女仔而先使未來錢，到時人財兩空，啲情債同錢債就有排你還呀！
屬蛇嘅朋友承接去年嘅餘威，今年雖然冇乜吉星輔助，但運氣仍然係不俗，而且容易有意外之財出現，如果平時有小賭怡情或投資股票嘅朋友，今年可能獲利甚豐，身上有錢同樣難免花得特別爽手。屬猴嘅朋友花錢喺追女仔上，而屬蛇嘅朋友今年花錢會喺個人享樂上，由於花嚟自己享受所以花得心甘命抵，但只顧享樂始終冇乜得益，師傅建議屬蛇嘅朋友今年搵門自己喜歡嘅興趣進修一下，一來可以自己開心，二來學門技術將來總會對自己有幫助！
屬雞嘅朋友今年事業運不俗，雖然只得一粒吉星，但都夠晒佢用，所以事業上一定會再創高峰，因而財源廣進，所以使錢一樣大方闊綽，而使錢嘅方向，屬雞嘅朋友最喜歡收藏物品，例如玩具、飾物、珍品等，今年錢銀鬆咗，自然會喺自己嘅愛好上重錘出擊，大量入貨，由於佢哋所收集嘅東西，有價有市，所以可以當作投資，但由於今年事業得意，花錢滿足自己喜好同時，建議花多啲錢喺自己嘅拍檔同埋團隊身上，讓佢哋更賣力為你嘅事業打拚。
異性運：牛、猴、豬
桃花運：虎、馬、狗
和合運：龍、蛇
玄學提供：寶源師傅
撰文：小德