一個演員係咪要年年有奬攞兼且要擺到一屋都係，先至能夠肯定佢嘅地位呢？美國80年代末經典艷星Taija Rae就係一個好例子，雖然佢整個演藝生涯中從未攞過任何奬項，但名字不但仍留喺唔少人心中，而佢嘅作品至今仍然係色情電影中嘅經典之作。
喺1962年1月29日於美國費城出生嘅Taija Rae，自高中畢業後一直喺當地工作，及至21歲時被成人模特兒公司Lynx Management嘅星探發掘。對模特兒工作一直深感興趣嘅佢，好快就獲得到紐約拍攝成人寫真嘅機會。須知道當年模特兒出道會改番個藝名，而Taija Rae呢個相信係最多人讀錯嘅藝名就係喺呢個時候改成。據呢位傳奇艷星解釋，Taija其實係一位佢遇到過嘅亞裔雞尾酒女侍應嘅名，而Rae則係出自著名電影《金剛》女主角嘅姓。憑住佢一對38D巨乳同鄰家女孩嘅可愛樣貌，喺同年被成人影片公司East Coast睇中，搵佢參演兩套色情電影《Dangerous Stuff》同《Scenes They Wouldn't Let Me Shoot》。呢兩套電影不但係佢嘅處女作，前者更被XRCO列為色情電影名人堂嘅其中一套作品。
處女作嘅成功，Taija Rae嘅名字好快就喺紐約成人業界傳開，寫真公司、成人片商、夜總會等都紛紛向佢招手，演出電影多達126套嘅佢，先後合作過嘅著名導演有Henri Pachard、Chuck Vincent、Dave Darby等等。喺唔少人眼中，事業發展得相當順利嘅佢，其實內心一直對自己嬰兒肥嘅臉同略胖嘅身材相當不滿。及至1986年，轉投新經理人公司West Coast嘅佢以全新形象示人，成功減磅令身材變得苗條，又將頭髮染成金色，令佢睇起嚟更成熟、更有女人味，不但成功將色情事業推上高峰，更被當時嘅美國成人雜誌Hustler，評為與Traci Lords、 Ginger Lynn同Amber Lynn並列四大艷星之一。喺色情電影界打滾多年嘅佢，雖然從未攞過任何個人獎項，但佢演出嘅情慾電影如《Hot Rockers》、《Taboo American Style – Part 1: The Ruthless Beginning》、《The Backdoor Club》等，至今仍被視為經典之作。
撰文：魂