男人對另一半嘅忠誠度原來喺日常生活中有迹可尋，太太們想知道佢有冇作怪，只要留意佢……日本為防止師生戀，竟禁玩通訊軟件！台灣囡囡希望另一半收入有七萬台幣（約萬七蚊港紙），但現實只有6.2%達標！
男人嘅忠誠度原來係隨着身邊嘅異性多寡而決定，據美國猶他州大學嘅一份調查指出，男人如果身邊冇其他異性，就會對自己唯一嘅伴侶特別忠誠，而且會在做愛上表示出來，例如一周做愛次數或時間，都會十分穩定，但如果身邊異性不止一個，他那忠誠度就會下降，就算呢啲第三者未曾得手，但佢哋嘅床上表現，會先行調整，例如平時一周四次，會變為一周兩次，萬一把第三者弄到手，咁佢哋嘅表現就會更差，所以要想知道自己老公有冇作怪，睇佢近日嘅床上表現就知道！
據日本《讀賣新聞》報道，因為去年神奈川縣有多單師生戀嘅醜聞相繼曝光，於是教育當局就開會商討對策，最後倣效埼玉縣嘅做法，就係禁止男老師擁有女學生聯絡嘅通訊軟件，如果真係有需要聯絡，事前要得到校長嘅批准，聽落真係匪夷所思，但當地老師覺得冇乜問題，而有關方面點解會咁做呢？原來之前幾單師生戀，都因為老師和學生私下玩通訊軟件Line，玩玩吓玩出感情，所以教育部門就一於斬腳趾避沙蟲，其實師生戀未有通訊軟件前早就有發生，你禁Line嚟又有乜嘢用呢？
台灣有網站較早時做咗個調查，得知當地好多適婚女士都希望另一半有七萬元或以上台幣嘅月薪，為起嚟約萬七蚊港紙，其實要求唔係好高，但結果公布後，隨即引起全城哄動，有人大力贊成，有人大力反對，而最近有媒體搵到政府統計處嘅公報，年齡介乎20到30歲之間嘅適婚男士，有七萬台幣月薪嘅朋友竟然只佔6.2%，真係少得可憐，而佢哋平均嘅收入只得四至五萬元，即萬三蚊港紙唔到，所以香港嘅巴打們咪怨自己收入太少，買唔到樓又娶唔到老婆，比起台灣巴打已經好好多啦！
撰文：小德