有人話如果想成為一位引起大家留意嘅女星，最重要係識得點樣營造話題，如果按呢句說話嚟睇，著名艷星愛染恭子絕對做到呢點。事關從佢入行以嚟不但憑住出眾外形令大家眼前一亮，誘人嘅火辣演出加上銀幕下出位嘅行為，更令佢成為話題女神。
咪睇愛染恭子個樣成個日本人咁樣，查實呢位喺1958年2月9日於日本千葉縣出生嘅女優，佢嫲嫲原來係個加拿大人，換言之佢擁有四分之一嘅加拿大人血統，而據佢講細個時由於一頭金髮，故此令唔少人誤以為佢係外國人。就讀於東京立忍岡高等學校嘅佢，畢業後從事裸體模特兒工作，直到1975年到日活株式會社試戲，結果憑住俏麗樣貌被挑選參加粉紅色電影《痴漢地下鐵》演出，跟住佢就以藝名青山涼子，先後參演接近20套粉紅色電影。雖然佢演出機會多，但一直以嚟都並非擔正，及至1981年被日本導演武智鐵二睇中，搵佢做色情電影《白日夢》嘅女主角。呢個時候改名做愛染恭子嘅佢，憑住呢套話題性作品終於為人所熟悉。
《白日夢》之所以係話題作品，皆因導演武智鐵二出咗名電影內容相當大膽，之前已經因電影有性器官特寫，而被日本映畫倫理委員會要求刪去有關片段，嚟到呢套作品佢更有真軍上陣嘅畫面，難怪引嚟一時哄動。愛染恭子成名後除咗繼續演出色情電影外，仲從事脫衣舞演出，只係喺1983年1月於大阪府嘅劇場表演脫衣舞時，被警方以公然猥褻罪逮捕，最後被罰款5萬日圓，同年7月喺橫濱演出嘅佢又以同一罪名被捕。不過呢位話題女神嘅故事仲未完，到咗1984年佢演出成人影帶作品《The Survival》時，為咗更迎合處女喪失嘅主題，於是接受處女膜再生手術，再次引嚟社會極大反應。演出完呢套片後，佢亦漸漸轉到成人影帶方向發展。及至1994年4月正式離開色情電影界並轉向AV界發展，呢段期間佢不僅演出，更從事編劇同導演工作，及至2010年3月演出完團鬼六原著嘅AV《奴隸島》後便宣布正式引退。
撰文：魂