雖然話同行如敵國，喺日本AV界當中女優與女優競爭相當激烈，但係又好少見到佢哋有同場互相鬥法嘅情況發生，唔似得以前班女優咁，經常合作演出，於片中由激烈爭仔到聯手擒男咁過癮。最近女優間嘅比併終於展開，不過唔係喺AV界，而係將戰場移師到電影界，而比併嘅女優更係代表三個唔同時代嘅經典AV天后！
好多日本AV女優都希望能夠學已故AV天后飯島愛一樣，成功跳出AV界走入藝能界發展，唔需要再出賣色相。之不過，自飯島愛之後，成功嘅例子唔係好多，可以數得出嘅得及川奈央，仲有兩大天后高樹瑪莉亞同穗花，最近佢哋更同現役天后明日花綺羅差不多同步有新戲推出，屬於三個唔同時代嘅天后實行激戰電影界。
提到呢兩位天后相信資深AV迷無人不識，瑪莉亞活躍於2000年初期，係繼及川奈央之後嘅天后級女優，其樣子好似知名女歌手松浦亞彌咁可愛，身材豐滿誘人，出道以來因表現出色而奪得唔少獎項，喺2004年退出AV界轉投藝能界發展，又拍電視劇又拍電影，撈得相當掂，有人話佢係繼飯島愛之後轉型得最成功嘅AV女優，其電影新作《死目少年》將會喺2月15日上映。
《死》片當中，瑪莉亞飾演神秘嘅風俗孃釋笛子，雖然係第二女主角，但係一位改變男主角嘅關鍵角色，可想而知戲份不少，同時喺戲中有性感演出。
另一位天后穗花係經典中嘅經典，曾經做過賽車女郎嘅穗花出道拍AV嘅時候驚為天人，胸大腰幼又夠Fit嘅身材被稱為Super Body，更憑幾近完美嘅胴體喺AV頒獎禮Video Body大賞中列入Nice Body頭5名。而穗花可以話係癡女嘅先驅，憑住出色演技喺Sky PerfecTV成人放送大賞榮獲最優秀女優獎。穗花轉戰藝能界之後發展都算唔錯，拍過嘅電影同演出嘅綜藝節目極多，由佢主演嘅電影《極道之教典》系列已經推出DVD，當中穗花扮演文靜律師助手，戲份甚多。
至於明日花綺羅主演嘅電影《Iron Girl Ultimate Weapon》將於1月17日上映，綺羅擔正女主角，飾演戰鬥力非凡嘅末世女戰士，為正義而戰，粉絲們一定唔可以錯過。
撰文：賢