所謂瘦田冇人耕，耕開有人爭，小弟想當年為求穩穩陣陣，特登搵個唔係咁標致嘅女仔做女友，點知一拍拖之後就吸引成群餓狼日日圍住女友，咁我可以點做呢？梗係加多兩錢肉緊，送禮物多咗又貴重咗啦。事實上，好多面對如此情況嘅男人不但會對女友更加殷勤，喺床上亦會表現得更加勤奮。早前美國奧克蘭大學進行有關女伴周邊環境與男士床上「活躍」程度嘅研究報告，搵來393個與異性保持親密關係嘅男士協助，結果發現女友身邊嘅男同事愈多，男方主動要求交歡嘅次數愈多，研究負責人就稱呢種現象為「精子競爭」。為咗成功令卵子受精，精子之間會進行激烈鬥爭，情況簡直係至死方休，而精子嘅原始本能亦會體現於男人身上，更加令佢哋透過精子嚟對抗其他競爭對手，所以女友身邊愈多異性，則令男友嘅精子愈活躍，生產量亦更多，慾火自然更加旺盛啦！