所謂食得是福，作為一介肥仔嘅我，其他人一睇就知我有福，但世界上卻有好多人比我更有福，身形卻比我瘦得多嘅大食之輩。其他唔需要講，就講最近活躍於日本藝能界嘅青木愛，其身材纖巧婀娜，但係一餐要食三、四碗飯，真係估佢唔到呀！
運動員生涯一般唔多長，只係十年貨仔，當中仲會經過好多起起跌跌，能唔能夠打出好成績都係未知之數。轉眼間運動員生涯過去，就要另尋出路，有人會轉做教練，有人會轉做體育新聞從業員，而喺日本女運動員就比男運動員好，因為佢哋可以憑美貌及身材進軍藝能界，好似之前介紹嘅前乒乓球好手四元奈生美，青木愛亦係繼奈生美之後由體育界轉投藝能界嘅好例子。將踏入三十之齡嘅青木愛唔算一等一絕色美人，但都叫做五官標致，最重要係佢成日都笑吟吟，笑容仲相當燦爛，令人睇見開心之外，更流露出一派予人親切感嘅傻大姐風格。青木愛嘅身材亦令人興奮到暈，一來佢身高接近5呎9吋，且腰幼而胸前有肉，絕對係一副難得嘅健美靚偈！
青木愛如此健美而豐滿嘅身段並唔係一朝一夕得來，佢8歲就擅長游泳，且學習韻律泳，到2005年阿妹更加憑過人技術而成為世界游泳比賽嘅韻律泳日本代表。喺2008年京奧，青木愛亦有份登場，雖然只係奪得第五名，但能夠打入決賽總算叫做有所交代，無愧於面對江東父老喇。京奧之後，青木愛就宣告引退，隨後就進軍藝能界，靠其身材同面孔搵食，拍寫真之餘亦為各媒體嘅體育節目如《京Sports》做記者同主持，工作相當多，觀眾們對佢亦相當受落。其實青木愛仲係運動員嘅時候就已經鋪路入藝能界，不時登上綜藝節目做嘉賓玩遊戲，某次仲暴露出令人吃驚嘅地方。某一次演出綜藝節目，佢嘅一日餐單被曝光，早餐就已經要食兩碗飯，午餐更要食一碗飯同一大碟意粉，到晚餐就要有三碗飯加大量配菜，臨瞓之前仲要食多五塊烤日本年糕！食量驚人但係又食極都唔肥，搞到同場嘅其他女星不知幾咁妒忌。
青木愛唔做運動員之後，除咗演出體育節目，仲經常拍寫真大騷誘人身段，從其博客當中就可以知道佢日常生活點滴喇。
網址：http://ameblo.jp/ai-mermaid/
年齡：29歲
身高：5呎9吋
三圍：34E-24-33
撰文：賢