好多模特兒都留有一頭長髮，方便髮型師作出千變萬化嘅造型，如果模特兒留嘅只係一頭短髮，咁造型上肯定會大打折扣，但出色嘅模特兒反而會把缺點化為優點，令自己個性更為突出，就好似娜依靈兒就係其中代表！
現居北京嘅娜依靈兒，出道大約三年，除咗做平面模特兒外，仲係出色嘅演員，但同時仲係註冊導遊，至於負責乜嘢地方就冇講，你話跟團跟正佢嚟帶隊，真係人都開心啲，事關娜依靈兒曾勇奪內蒙十佳模特兒，所以有網友估佢祖籍係蒙古人，因為阿妹嘅五官深邃，輪廓突出，所以係蒙古人一啲都唔出奇，但喺佢官網裏面就冇講過，佢讀大學時，係喺北京航天航空大學主修中國語言文學，有網友話只有少數民族嘅朋友，至對漢族語言文學咁有興趣，又好似講得幾啱。無論佢係咪蒙古人，但可以肯定佢係一個大美人，樣子標致已經唔使多作介紹，身高有170cm，高頭大馬，而身材有前有後，有大有小，單係樣貌身材就足夠條件佢喺呢行大紅大紫。
講起外在條件，娜依靈兒一頭短髮，亦幫佢加咗唔少分，因為短頭髮嘅靚女畀人感覺自我同硬朗嘅個性，所以阿妹無論普通時裝照定係性感寫真，都能充分發揮呢種優點，特別係性感寫真時，同時下娃娃裝或者東洋風嘅囡囡一比起來，佢就更有獨特色彩，贏足佢哋九條街，所以娜依靈兒除咗有男粉絲，仲有好多女粉絲添，但佢最想做嘅都係演員，因為佢唔係科班出身，所以好想短期內有多啲演出嘅經驗，磨練一下演技，所以佢不斷向劇組揮手，目前都有接咗幾組喺手，佢充滿野心，希望一年接拍到十個八個角色，至於係乜嘢角色，佢都話冇問題，至於要佢犧牲色相，話只要劇情需要，佢都會欣然接拍，阿妹咁搏，呢期想唔走紅都幾難！
簡介：娜依靈兒嘅性感寫真，只要上網就一定見到，但好多都要下載，搞到部腦中晒毒都睇唔到，最穩陣都係上佢嘅官方微博，包保睇得放心又開心。
網址：http://weibo.com/u/1639828700
居住地：北京
三圍：35-23-34
身高：170cm
撰文：龍四海