今年收到好多紅色炸彈，連番出席婚宴都幾悶吓，皆因程序好多都一模一樣，不過作為賓客都唔好咁多怨言喇，因為新郎哥至係最淒涼，一來要使好多錢擺酒，二來仲要晨咁早去接新娘，之後喺婚宴酒會上全程走嚟走去招呼親朋戚友，期間又要不停咁敬酒，攰到不得了，真係唔知完成婚宴後仲有冇氣力洞房囉！原來，新婚夜難洞房喺外國亦有出現，根據英國一間婚禮籌辦公司表示，有近9成嘅新婚夫婦都希望可以喺新婚當晚享受魚水之歡，之不過只有四分之一對新婚夫婦可以成功洞房，其他都係失敗，原因有唔少，包括新郎當晚飲得太醉、新娘太攰、要照顧小朋友所以唔得閒洞房等等。個人認為結婚實在唔使搞咁多嘢，簡簡單單一樣可以開開心心，而且親友都唔應該係咁隊新郎哥飲酒，因為酒入愁腸愁更愁，步入戀愛墳墓已經好慘喇嘛！