安全套嘅功用除咗避孕，仲有減低性病傳染嘅機會，絕對係保護自己同伴侶嘅必備之物。之不過，最近有人覺得安全套仲未夠安全，要設計多個配件嚟增加安全性。美國有兩間公司聯手設計同製造出一條名為「Scroguard」嘅乳膠製安全底褲，主要係畀男性喺交歡時穿着，條褲有個窿，穿上之後就可以再使用安全套。生產商話可以保護埋雙方嘅三角地帶，避免互相摩擦而受損，從而進一步加強對性病嘅防禦能力。然而，呢條安全底褲本身設計已經夠騎呢又肉酸，以乳膠製造更加焗到分分鐘生熱痱，再者，生產商話着呢條褲一定要貼身，否則進行激烈運動時就會產生令人起雞皮嘅「唧唧」聲。嘩！咁麻煩，真係搵你着喇！