模影模蹤：仁藤美咲 客串做陪酒

H奶超靚偈

時代愈來愈進步，除咗大家嘅生活得到改善，我覺得連日本水着妹嘅質素亦隨年月而上升。舊陣時水着界不乏巨乳女優，身負震撼性巨乳嘅好似瀧澤乃南、松金洋子、相澤仁美等都偏向肥膩；但係家陣就唔同講法，新一輩嘅巨乳女優胸大大腰幼幼，仲生得相當靚女，今日為大家介紹嘅仁藤美咲就係其中一位喇！今年21歲嘅美咲青春俏麗，笑起上嚟可愛，唔笑嘅時候冷艷兼帶幾分妖媚之氣，認真引死人！更令我哋男人為之血氣上湧之處仲有阿妹嘅魔鬼身材。身高5呎6吋，一雙美腿纖巧又修長，配埋35-23-34嘅三圍夠晒高挑婀娜，上圍仲有一對純天然彈手H奶，呢副靚偈真係足以橫掃水着界，唔怪得近年成為業界寵兒，成日都做到雜誌封面女郎。

模擬學陪酒

美咲喺2010年出道拍寫真，仲成為寫真女郎團體「BA5」嘅成員。跟住團體四圍搵食對於一個新人嚟講絕對係一個好開始，而美咲嘅星運一直以來都相當唔錯，出道初期參加日本電視台主辦嘅「汐留寫真甲子園」選美活動得到冠軍，再過一年參加「Miss FLASH」選美比賽又奪冠，並被選為水着妹團體「GGirls」嘅成員。近期美咲在籍嘅團體BA5就轉型為歌唱組合「persolate」，幫助阿妹除咗喺寫真界發展之外，又再多一條搵食路線。美咲其實仲唔只咁少瓣數，電影界都對阿妹恩寵有加，早前就獲邀演出講述陪酒孃生活嘅電影《Honey Flappers》喇。美咲喺當中扮演一個叫做莉莎嘅陪酒孃，而為咗揣摩角色，特別搵身邊幫襯過陪酒店嘅男性做模擬訓練，學吓陪酒孃點樣同客人傾偈，點樣雙手拎火機為客人點香煙等等，認真夠晒專業！

個人博客

仁藤美咲最鍾意就係扮靚靚，不時會將扮靚之後嘅自拍照放上博客同大家分享，如果有興趣學美容，不妨Click上佢個博客參考。

網址：http://ameblo.jp/mitakin/

撰文：賢