美國有個26歲嘅無業男子，居無定所，身上一個仙都冇，但竟然晚晚有囡囡陪睡，有乜嘢咁巴閉？佢話自己口才了得，三言兩語就能俘虜對方嘅心，嚟自帝濠桑拿嘅小叮就話：「呢啲男人講嘅嘢，大家千萬咪信呀！」
小叮話：「我兩年前識咗個男朋友，佢話自己啱啱大學畢業唔想咁快打工，所以四處體驗生活，佢身上只得幾蚊神沙，我咪好心請佢食餐飯囉！點知佢食完之後就話好喜歡我，覺得同我好有緣，仲話如果要結婚一定會搵我做佢新娘，畀佢嘅甜言蜜語搞到我暈晒大浪，之後又見佢冇地方落腳，咪畀佢上我屋企囉！佢梳洗一輪後確實又幾靚仔嘅，於是嗰晚咪同佢上咗床囉，之後做男女朋友！起先食我嘅，住我嘅，我都冇乜所謂，鬼叫自己冧佢咩！但一食就食咗成年，佢唔做嘢不特止，連工都冇搵，有啲朋友介紹工作畀佢，佢見都唔去見，大佬！我打份工得雞碎咁多，我都想有人養，家陣竟然要我養佢，於是同佢鬧過幾次交囉，之後愈嚟愈唔對路，索性同佢一刀兩斷。」
咁喺交往嘅日子中，佢仲呃咗你啲乜嘢呢？小叮話：「首先佢根本唔係大學生，佢呃我話係讀電腦，點知叫佢整部電腦，仲整鬼爛咗添，佢解釋話主修係程式設計所以唔識整機，我當時信佢，但後嚟有朋友係程式設計師，大家傾開偈，佢竟然連一啲基本術語都唔識，我就知佢講大話。後嚟叫佢出嚟打工，佢唔係話頭暈就肚痛，唔係嫌公司太遠，就係工作時間太長，總之藉口多到你唔信，最令我忍唔住，就係一開始交往就話要同我結婚，但喺埋成年時間，佢遲遲都冇行動，之後仲發現佢不斷同其他女仔關係曖昧，我好幾次嚴刑逼供問佢有冇出去偷食，但佢好口硬，加上冇證據，我都冇佢辦法，但事後好肯定佢唔只我一個女人，所以呢啲浪子型情人真係少惹為妙呀！」
年齡：21歲 三圍：36-24-35
撰文：小德 攝影：阿昌