演出武打動作片絕對唔係男明星嘅專利，舊陣時唔少女星都功夫了得，好似楊紫瓊、羅芙洛、大島由加利等，一樣可以將壞人奸黨打到飛起。到近代不少女星都係靠美貌同身材搵食，要搵個武打女星真係幾難，不過日本水着界就有一個，佢就係八代兼美喇！
做男人最好就係大大隻隻，睇落威武又雄壯，唔打得都睇得，更可以給予女仔安全感，不過大隻得嚟最好仲要肌肉結實，否則女仔一攬埋嚟，發現你全身肉地鬆泡泡，好感度自會直線下滑。其實，女仔身材結實一樣有吸引異性嘅效果，唔信可以睇吓今日為大家介紹嘅八代兼美。今年29歲嘅兼美五官標致，氣質帶點柔弱，睇睇吓小弟仲覺得阿妹個樣有少少懷舊Feel，因為兼美帶畀人嘅感覺同八十年代嘅水着妹相當相似。兼美柔情似水嘅面孔之下，身材卻係無比火辣。5呎5吋嘅身高比起好多水着妹都高挑，35D-23-35嘅三圍仲婀娜非常，而且全身肉地結實、肌膚緊緻，一睇就知道阿妹有響應我哋政府嘅呼籲保持日日運動嘅良好習慣，認真抵讚。
2006年八代兼美就出道拍水着寫真，由於佢美貌吸引、身材驕人，所以推出嘅寫真集同DVD都甚受歡迎，一年之後阿妹更加獲選為三洋物產第三代海軍藍小姐添。自此兼美除咗拍水着寫真之外仲多咗好多演出機會，例如參演電視劇如《家族八景》、《吊帶衫戰鬥機》等。此外，兼美亦搵到參演電影嘅機會，作品有《蒙面超人 W Forever AtoZ》，仲曾經做過女主角，作品就係《機關槍少女》。喺呢部作品當中，兼美唔單只得到活躍B級電影嘅前AV女優亞紗美指點，得到演技上嘅啟蒙，從拍攝過程當中仲學識武打技巧，幫助佢日後喺其他作品掌握武打場面。近期，阿妹嘅功夫就令佢成功打上舞台，喺舞台劇《戰國BASARA 3》入面兼美就扮演雜賀孫市呢位戰國歷史人物，當中打戲唔少，但係對於兼美嚟講簡直就係濕濕碎。
八代兼美會將自己嘅生活點滴透過微博同大家分享，另外仲會上載自己覺得有趣嘅片段，有興趣不妨Click入去睇睇。
網址：https://twitter.com/minaasy
撰文：賢