有說「女子無才便是德」，到家陣呢句說話其實都幾啱使，因為女仔只要生得靚，身邊自必然有班觀音兵，有嘢做咪即管吩咐囉，使乜自己做喎！只不過，田中涼子就係因為不明此理，成日闖禍兼且引致笑料百出。
早前有報告指出，香港地嘅適婚年齡人士當中女多男少，比例去到失衡嘅程度。而盛女愈來愈多嘅原因，好有可能係佢哋嘅擇偶條件定得太高，搞到久久未搵到一個認為合適嘅拍拖對象。其實，盛女們應該放下身段同成見之外，最好仲將心態回到昔日十幾歲般天真爛漫，個人自然活潑又開朗，再帶幾分傻氣，溝仔都容易好多啦！唔明就可以學剛剛宣告拉埋天窗嘅田中涼子。涼子今年雖然30歲，但係佢同好多水着天后如星野亞希、杉原杏璃一樣，仲保持到一副卡娃依童顏，睇嚟仲同初初出道嘅時候咁青春省鏡。涼子嘅身材家陣亦同往日咁苗條婀娜，雖然上圍得33B，但係由於佢身材小巧玲瓏，仍然不乏睇頭，吸引指數高企！
田中涼子喺2005年開始做賽車女郎，之不過因為身材唔夠高挑豐滿，名氣未能谷起，到2007年參加ZAK THE QUEEN選美活動佢至正式出道成為寫真偶像，憑住青春活潑嘅氣息以及嬌小身材而成功突圍，後來仲參演過唔少綜藝節目，而電影作品亦有唔少，例如《妖怪大世紀》等。其實涼子之所以踏入演藝界全因為自己大懵。做賽車女郎之前，涼子喺醫院做雜工，一次搬運工作中唔小心將血液樣本當垃圾丟掉，於是就畀醫院解僱。然而，涼子大懵嘅個性仲未有改善，有次去吉隆坡演出，發現唔見咗本護照，滯留當地八個鐘之後再被送返日本，最後諗起原來自己又將護照當垃圾掉咗。除咗大懵，涼子仲唔多衞生，佢喺一次訪問表示沖涼嘅時間好短，捽完梘液再淋一淋身就完事，經常喺沖完涼之後發現仲有梘泡。希望阿妹喺結婚之後唔好再係咁啦，唔係老公仔分分鐘要退貨o架。
年齡：30歲
身高：5呎
三圍：33B-23-32
田中涼子最近公私兩忙，但係一得閒就會將自己嘅生活點滴上傳到博客同大家分享，粉絲要密切留意喇。
網址：http://ameblo.jp/ryoooko
撰文：賢