渡海濠情：生仔騷 一票難求
英國有個23歲嘅大肚婆，早前忽發奇想，喺網上售票睇佢生仔，名額只限四位，點知一推出就賣晒，總共收咗三萬美金，折合廿幾萬嘅港幣，嚟自利澳水療嘅葉子就話：「我生仔時都要整番場至得！」
門票收入
葉子話：「我早就諗過，將來生小朋友一定會自然分娩，因為剖腹分娩快就係快，但肚皮上就會有一條疤痕，咁我以後點着比堅尼呀！所以辛苦啲就辛苦啲，一於自然分娩，而且我份人自小就好捱得苦，雖然生仔足有十級痛楚，但好多女人都捱得到，相信我都一定可以，所以我想有人見證歷史一刻，老竇當然要睇住，但如果有人喜歡睇，我都唔介意，當然畀錢買門票入場嘅仲好，收番幾十萬，真係乜嘢痛都值得呀！」
電視直播
咁你打算畀幾多人睇呀？葉子話：「我要睇吓產房嘅空間，如果可以放多啲人入去，當然放得愈多愈好啦！我仲諗過可能分兩種位，一種係山頂位，遠遠圍住睇，另一種係握手位，可以握手替我打氣，到時見到咁多人替你加油吶喊，生小朋友都可能會容易啲！至於收費我唔敢收得太貴，山頂位五、六千蚊一張差唔多，至於握手位就一定要過萬！如果有電視媒體想直播嘅，我賣埋直播權都可以，總知萬事有商量，價錢唔啱傾到啱囉！」
葉子Profile
年齡：21歲
三圍：35-24-35
撰文：小德
攝影：阿德