有車階級有好多煩惱，一係揸車出街嘅時候要搵位泊車，二係要洗車，前者要靠運氣，後者就方便好多，因為洗車大可以假手於人，只要畀錢就搞掂。而喺美國，畀錢人洗車仲係一種享受，因為唔少地方都有比堅尼洗車服務，有身穿比堅尼嘅美女幫手，見到佢哋洗車洗到濕晒身，唔係享受仲係乜？早前比堅尼洗車仲出現於內地，據聞喺北京朝陽區就有一檔，提供身穿泳裝嘅青春少艾幫客人洗車兼打蠟，每次收費為880人仔。之不過，由於呢種洗車服務實在太出位，搞到畀街坊同傳媒指為庸俗並且有傷風化，所以喺7月14日開檔之後即日就終止服務，想幫襯嘅客人認真大失所望喇！