豐滿嘅上圍確可令男士為之瘋狂，但真正能夠令男士着迷嘅，其實唔係兩團碩大嘅脂肪，而係一種幻想、一種感覺。呢樣嘢其實唔需要勁爆身材都可以畀到大家，好似上期介紹嘅西國女星維多利亞阿布利爾係其中一例，而茱莉姬絲蒂（Julie Christie）亦係一個好例子。
喺香港，我哋會稱呼影圈艷星為肉彈，因為好多肯剝肯脫嘅艷星都擁有一副好身材，上圍特別豐滿誘人，之不過喺外國就唔同咁講法，唔少知名女星上圍其實冇乜睇頭，之但係佢哋一旦肯剝衫演脫戲，一樣可以憑住個人魅力迷倒萬千觀眾，絕對唔需要靠多餘脂肪取悅大家。英國經典女星茱莉姬絲蒂就曾經因為唔夠大波而被人唾棄，但喺後來所拍嘅一套情色片中一幕床戲卻被封為「最性感床戲」。
1941年茱莉於印度出生，不過佢唔係印度人而係英國人，原因當年佢阿爸由英國去到印度從事茶葉生意。隨住雙親嘅關係多次改變，茱莉喺成長期間輾轉搬到英國、美國同威尼斯居住。茱莉入讀倫敦嘅中央演講和戲劇學院，從而被發掘演出電視節目。後來，更被挑選為首部占士邦電影《Mr. No》嘅邦女郎，可惜導演嫌佢個胸唔夠大，唔揀佢而揀咗身材火辣嘅烏蘇拉安德絲。
雖然錯失咗呢個成名嘅大好機會，但係茱莉嘅星途並冇因為咁而窒礙。拍咗幾部喜劇後，茱莉喺1963年主演電影《Billy Liar》，就憑住出色演繹而贏得英國電影學院獎最佳女演員大獎。茱莉高雅嘅氣質以及上乘演技，更得到名導演John Schlesinger賞識，往後同佢合作拍咗唔少電影，當中為茱莉帶來無上光榮嘅就一定係1965年上映嘅《秋月春花未了情》（Darling）喇，因為佢就係因呢部電影而成為奧斯卡影后！同年佢演出嘅《齊瓦哥醫生》亦得到唔少獎項，所以《Life magazine》就形容1965年係「茱莉姬絲蒂年」。
雖然茱莉地位非凡，但係要佢作性感甚至係裸露演出亦一樣得，最近，E字頭國際女性時尚雜誌就選出茱莉喺1973年上映嘅電影《血光鬼影奪命刀》（Don't Look Now）當中嘅床戲為「最性感床戲」，原因除咗係茱莉喺戲中作全裸演出並同男主角打得火熱，戰況激烈，最重要就係茱莉喺完事到整理衣服離開期間，都充分表現出女性得到性滿足之後嘅愉悅！唔睇就走寶喇！
撰文：賢