位於十月初五街嘅康公廟同埋福慶街嘅醫靈廟內，都供奉咗一個女菩薩，名字叫做「花粉夫人」，但問過好多老街坊，花粉夫人有乜來頭？竟然問十個十個都唔知道，於是返嚟香港打探一下，發現灣仔嘅洪聖古廟都有供奉花粉夫人，而且發現佢仲有「朵」添，叫做「灣仔雙花」，原來佢同「金花夫人」係一對嘅，金花夫人主要是負責求子得子，安胎順產嘅神仙，如果想「轉胎」，即係怕再生女，想改為生仔，亦一樣可求佢；至於花粉夫人就係負責生咗仔後，母子平安嘅神仙，而當時小朋友生得出，最怕食唔飽，所以佢亦係祈求奶水充足嘅女神，想隆胸亦不妨搵佢，而且女子產後極需要調養身體，而呢瓣佢都包埋，所以整吓整吓，但凡女士們想靚想瘦想豐胸，都要搵佢幫手。而澳門康公廟內花粉夫人像旁，就有一對聯寫住「花容增美艷，粉面妍嬌顏。」證明九成善信嚟搵佢，都係想樣靚身材好，亦因為佢嘅專業，吸引咗不少妓女嚟參拜，百多年前，香火特別鼎盛。