桃花崗係唔少澳門人嘅集體回憶，因為見證住當地工業發展嘅興衰，加上亦係當年嘅溝女勝地，唔少朋友喺度搵到自己嘅另一半，一啲上咗年紀嘅阿叔阿嬸，唔喺呢區返工居住，都周不時會返去坐吓，捧吓啲奶茶檔同餅店嘅場。一直太平無事嘅桃花崗，近幾年突然惹上官司，話說有地產發展商走出嚟話擁有桃花崗嘅地權，要求收地重建，小商販一直以為自己身處官地，年年向有關部門交地租同埋申請續牌，幾時官地會變咗私人地？如果係私人地，政府點解又收佢哋嘅地租呢？於是反對遷拆，事件一鬧大，有好多市民出嚟聲援，最後提出司法覆核，一搞搞咗幾年，最近宣判話地產商當年以「和平佔有」，類似香港「逆權侵佔」，取得嘅地權可能有問題，但事件未有咁快搞掂，因為地產商仍可能上訴。桃花崗最後命運如何，仍然係未知數，所以要緬懷桃花崗，就要把握時間嘞！