講起澳門嘅桃花崗，七、八十年代絕對係一個「溝女聖地」，因為附近工廠林立，女工多不勝數，而且嗰個年代，有好多偷渡入境嘅人蛇，都會躲喺工廠裏面打工，佢哋大多數都係年輕少女，而且思想十分單純，當時有男仔主動同佢哋講嘢，已經十分怕醜。據啲老街坊講，當年想結識呢啲工廠妹，可以話十分容易，只要你打扮有番咁上下，加上有架綿羊仔就實冇問題，因為落嚟打工，好多人邊度都冇去過，你肯車佢周圍去吓，已經係好大嘅誘惑，加上你喺平日就落足噱頭，表現親切，到適當機會就話約佢假日去邊度邊度玩，啲囡囡九成都答應，到咗假日你就車佢哋呢度去嗰度去，其實主要係望吓山望吓海，咁就可以啦！本事嘅即日就可以拖到手仔，甚至錫到嘴仔添，大家咪以為冇料到，喺當時嚟講已經好出位啦！啱嘅你哋就拍吓拖，兩三年後就結婚拉埋天窗，唔啱嘅，咁你再去桃花崗揀過，只要有恒心，總會揀到心水選擇！