從澳門議事亭前地靠左就會走到去大三巴，但如果轉右，你會走入伯多祿局長街，行幾分鐘就會發現一座十分宏偉嘅建築物，就係葡萄牙駐澳門總領事館，原來呢幢大樓有四百多年歷史。話說1569年，當時中國明朝隆慶三年，澳門嘅主教卡內羅神父，覺得嚟澳門嘅洋人愈嚟愈多，有需要開間醫院照顧佢哋，就以天主教中代表醫藥嘅聖人聖辣非命名為聖辣非醫院，亦由於坐落於白馬行附近，所以又叫白馬行醫院，佢就係當時澳門以至全亞洲首間嘅西醫醫院。據《澳門紀略》：「凡夷人鰥寡煢獨，有疾不能自療者，許就廟醫。」點解叫廟呢？當時啲街坊邊識分教會、聖堂，所有拜神嘅地方都叫廟，醫院由洋教士負責，所以亦被叫做「醫人廟」就係咁解啦！