家陣玩自拍已經成為生活嘅一部分，大家事無大小都會自拍一番，兼且放上網同朋友分享，之但係你會唔會將自己同另一半親熱完後嘅自拍照放上網公諸同好呢？網站「After Sex Selfies」專門收集完事後嘅自拍照，只要將同愛人親熱完嘅幸福一刻拍低，就可以上傳到網站同大家分享。據資料顯示，呢個網站只係成立短短個半月，但會員人數已有60萬名。至於上傳嘅照片中，除咗有一男一女甜蜜溫馨嘅自拍照外，仲有好多其他組合，最搞笑係有條友同吹氣公仔瞓喺床上，佢仲擘大口扮「O」嘴，同吹氣公仔相映成趣。而最多嘅自拍照片係男女大戰完後，一個瞓着咗，另一個就趁機偷拍。不過，細佬就覺得佢哋係一對正常男女朋友或夫妻就冇問題，萬一係出嚟偷食嘅話，咁仲唔鐵證如山，呢鋪真係水洗都唔清呀！