日前講到1622年荷蘭大軍殺到澳門，最後決定喺劏狗環登陸，坊間流傳佢哋一上岸就被劏狗場嘅環境嚇親，之後司令賴臣更腹部中槍退下火線，由副將魯芬頂上，繼續率大軍進攻，最後打到城下，點知又有怪事發生，一枚炮彈竟擊中停在後方的補給車，引爆埋車上嘅火藥，炸死五、六人，奮勇反擊嘅魯芬更被葡軍連刺十二刀倒下。原本有兩三百士兵留守劏狗環準備接應，但見到當時嘅恐怖情景，正慶幸自己不用上前線，點知就聽見兵敗嘅消息，焦頭爛額嘅同袍負傷跑回，嚇得軍心大動，不等齊人就上船撤退，遲嚟嘅士兵要游水出海至幸免於難，最後點算荷蘭士兵傷亡三百多人，無奈要撤退。葡軍守得住澳門，除咗上下一心之外，劏狗環嘅地理環境亦應記一功，但事實又係咪同傳說一樣呢？下期話你知！