講起清平直街嘅清平戲院，原來大有來頭，佢係當時珠三角最具規模影院建築物，即係同一建築物內可以睇電影，又可以睇話劇，當年冇乜嘢話劇睇，主要係畀觀眾睇廣東大戲。清平戲院原本係片濕地，當年嘅澳督批地時指明要起戲院，於是發展商就照辦，喺1875年落成。當年省港澳一般戲班都喺戲棚做嘅多，嚟得清平戲院演出，就有如喺紅館開騷一樣，絕對係身份嘅象徵，所以省港名伶老倌都一定嚟過清平戲院，由於戲班排住隊嚟演出，吸引不少內地嘅戲迷走嚟睇戲，於是戲院附近就多咗好多食肆旅館，而且百年前嘅追星族都有啲家底，所以成衣、金舖等更開到一街都係，之後賭場及妓院就喺附近橫街陸續開業，戲院建成後不出五年，整個填海區都熱鬧起嚟，發展商唔使破產，由蝕本邊緣變盆滿缽滿，都係全靠清平戲院咋！