小孩子係社會未來嘅棟樑，除咗要好好保護，仲要悉心栽培，幫佢哋心智健康成長。之不過，最近內地就有無恥之徒，居然連小學生都唔放過，企圖或意圖引佢哋玩Phone Sex，即係打鹹濕電話。早前廣州市一間小學嘅報告板上面，突然被貼上多幅誘人廣告海報，上面除咗印有一個酥胸半露、手執智能手機嘅性感女郎圖像，仲印住「Phone Sex 電愛神器 今晚等你」字句，一眾學生哥見此海報就圍住報告板議論紛紛。而家長們知道之後，就向校方查問同投訴，校方則表示會搵人清理海報，仲話會查清楚邊個咁大膽咁無恥在此張貼海報。不過我就覺得都係為時已晚，都唔知有幾多個學生哥睇到海報，繼而抵受唔住誘惑玩鹹濕電話囉。