講起鮑魚大家都食指大動，特別係原隻鮑魚用刀叉嚟享受，就更係身份嘅象徵，因為閒閒地都要過千元一隻。近年有一些假鮑魚，由調味粉同色素造成，稱為素鮑魚，提供畀素食館嚟做齋菜，由於口感同味道都幾可亂真，最重要係價錢夠平，所以不少廉價食肆同茶餐廳都會選用。前日到咗大富豪桑拿，見佢哋推出鮑片扒生菜嘅小菜，只見成碟都係鮑片，唔使講一定係素鮑魚，無論真鮑假鮑都好，要食得滋味，關鍵係個蠔王芡，而呢度嘅大廚做嘅蠔王芡，真係落足心機，除咗選用澳門一級靚蠔油之外，仲用清雞湯加豬骨熬製而成，所以芡汁鮮香味美，淋落鮑片同生菜上面，即係畫龍點睛，特別係啲生菜，沾滿濃香嘅芡汁，真係愈食愈可口，配埋鮑片更係一絕！