澳吧吧：拎咪高歌嘗美酒

對香港人嚟講，澳門最為熟悉嘅地方莫過於外港碼頭，皆因去濠江玩樂大多喺呢度登岸，卻原來喺碼頭附近就有一個可供大家把酒談歡嘅好去處，佢就係魔法術酒吧卡拉OK。如果大家未聽過其實一啲都唔奇，事關佢嘅位置都幾隱蔽兼且要落地庫，雖然係咁，但佢內裏嘅空間感唔錯，環境亦相當企理，最重要係招呼夠晒親切。酒類方面亦齊全，除咗有各種熟悉嘅啤酒品牌外，佢嘅雞尾酒亦可一試，當然，如果想試威士忌、紅酒同白酒嘅話亦有唔錯嘅選擇。不過要留意，佢要夜晚9點之後至開始營業，大家去之前要睇時間呀！